Nongpoh, Jymmang 16: Ki jingshiha ki paw bad ngim lah ruh ban kyntait ïa ka jingshisha, ha kaba ka shnong Umskun ba hap ha Nongpoh Constituency kaba don tang kumba shi tda ei ei na ka surokbah NH-6 ha Ri Bhoi bad kaba don ruh ha syndah ka district head quarter ka Ri Bhoi bad lada phai sha ki paidbah nongshong shnong ki hap ban mad ka jingsyrtok ka jingim ha ka leit ka wan na ka daw ba ki dang shah iehbein ha ka sorkar halor ka surok kaba ki donkam eh na ka bynta ka leit ka wan ha katei ka shnong.
Haba pynpaw halor ka shnong Umskun, kane ka shnong ka don tang kumba 2 km ei ei ka jingjngai na ka surokbah National Highway – 6 ha Ri Bhoi bad kane ka shnong ka la don kumba 60 tylli ki tnum ing bad palat 3 ngut ka jingdon ki nongshong shnong hapoh kane ka shnong, kaei kaba la pynpaw da ki paidbah ka dei ka jingsyrtok ha ka leit ka wan ba ka sorkar haduh mynta kam pat lah ban ai ïa ka surok rong ban suk ki paidbah ha ka leit ka wan.
Kane ka shnong ka dei ruh ka shnong ba jan baroh ki dei kiba im jakpoh na ka kam rep ka kam riang bad ka long pat kaba sngewsangsot ba ki nongshong shnong ki da kynduh mawsiang shisha ym tang haba lei tba wan bad wat ban pynpoi ïa ki mar rep sha ki iew ruh ki shem jingeh na ka daw ba ki Kali kim lah leit sha kitei ki shnong khamtam ha ka por lyiur.
Haba ïa kren bad ki lad pathai khubor, u Rangbah shnong ka Umskun, u Bah Stephan Kshiar, u la ong halor kane ka jingeh ki paidbah kaba dei na ka daw ka jingsniew ka surok la ju leit ud sha ki tnad sorkar bad ruh wat sha ki nongmihkhmat ba kin pynioh noh ïa ka surok rong, hynrei ka jingangnud jong ki paidbah kam shym la poi shaei shaei ruh ha kaba haduh mynta kane ka surok ka dang dei tang ka surok khyndew bad ka surok maw kabab uh shisha ïa ki paidbah ha ka leit ka wan.
“Halor ka jinglong jingman kane ka surok bunsien ka jingkynnoh ka leit ruh sha ki nongïalam shnong ba kim leh ei ei bad ka jingpyrshang ki nongïalam shnong ban pan jingïarap na ka tnad sorkar bad ruh na ki nongmihkhmat kam shym la poi shaei shaei ruh” ong u Bah Stephang Kshiar, Rangbah shnong ka Umskun.
U la ong ruh kaba sngew pangnud ka dei na ka bynta kiba pang ba shitom bad ki khynnah skul kiba leit skul sha Nongpoh bad kiwei kiwei ki skul, ha kaba na ka daw ka jingktieh ka surok ki hap ban loit ïa ki juti ban ïaid na katei ka surok bad jynjar ruh ban leit ki Kali kaba buh jingeh ïa ki paidbah ha ka pang ka shitom.
U la bynrap ruh ba kane ka shnong kam dei shuh ka shnong kaba dang mih dang mynta mynne bad ka dei ka shnong kaba la don la buh phew snem mynta bad kaba sngewsih ka long ba kum ki nongshong shnong pat ki shah iehbein ha ka sorkar ha kaba kim don ïa kata ka surok kiba bit ba biang.
Namar kata, u la ong ba ka shnong kan jin da la sngewnguh ïa ka sorkar Meghalaya lyngba ka tnad PWD ba kan thaw noh ïa ka mang tyngka ban siang rong ïa kane ka surok bad lada kum ki paidbah ki ioh ïa ka surok rong kaba la bit la biang kin jin da sngewnguh shi junom ïa ka sorkar jylla bad kaba long ruh ka burom jong ka shnong ba kan nym shah peitkhmat namar ka don tang ha syndah ka surokbah, u la bynrap.
