Nongpoh, Jymmang 10: Ka shnong Nongwah Maw-tamur ha Ri Bhoi District, kaba dei ruh ka shnong Khappud wat la ka dei ka shnong nongkyndong ba dang sahdien ha ki kam pynroi, hynrei kum ki nongshong shnong kiba dei ki nongrep ki pyrshong ban kyrshan ïa la ka ïing ka sem tang da ki kam rep ki kam riang.
Kane ka shnong Nongwah Mawtamur ka dei ruh ka shnong ba la kynnoh ba ka hap ha ka jingïakajia pud hapdeng Meghalaya bad ka Assam, ha kaba wat la ki nongshong shnong ki la kam ba ha ka jingshisha kam dei ban don kata ka jingïakajia pid ha kaba naduh hyndai hynthai ka dei kaba hap ha ka jylla Meghalaya, hynrei la wan shim kabu da ka Sorkar Assam tang na ka daw ka jingshah iehnohbeiñ ha ka KHADC bad ha ka sorkar jylla. Kane ka shnong ka don ruh kumba 3 ne 4 Kilometer na ka surok na Umling sha Patharkhmah, Jirang bad kiba bun hi ki nongshong shnong ki dang duna ha ka ioh ka kot na ka daw ba ka dei ka shnong ba ïa kynduh jingeh kaba hakhmat tam ka dei ka surok khohruh khohram.
Haba leit jurip u Nongrhoh khubor ïa katei ka shnong la lap shisha ba kiba bun ki nongshong shnong ki dei kiba im da ka kam rep kam riang bad ka jingrep ba kham ioh jingmyntoi ka dei ka jingthung kwai bad rep tympew nalor kiwei kiwei ki kam rep. Kane ka shnong bad ka thaiñ ka dei ruh kaba biang tam ban rep kwai bad tympew bad katkum ka jingioh lum jingtip na ki nongshong shnong ki la pynpaw ba nalor kiwei ki mar rap ba ki rep dei tang u kwai bad tympew ba ki kham ioh jingmyntoi.
La ioh ruh ban ïa kren bad ki katto katne ki riew rangbah ha kaba ki la pynpaw ka jingsngewkhia halor ka jingsahdien katei ka shnong bad kawei na ka jingsahdien ka dei ka surok kaba ki angnud ban siangrong noh da ka sorkar jylla, namar ban pynpoi ïa ki mar rep sha ki ïew ki hat ka dei kaba eh tam namar ka surok kaba khohruh khohram bad ba ka dei tang ka surok khlaw bad surok khyndew.
Kitei ki riew rangbah ki khmih lynti ruh ban poi ki kam pynroi na ka jylla Meghalaya khnang ba haba wan ki kam pynroi ka jingmyntoi ym tang ban kyntiew ïa ka ioh ka kot ki paidbah, hynrei kin long ruh ki nongkynti ban ïada ïa u pud u sam ka jylla kumba kane ka shnong ka la don ha syndah ka jylla Assam.
