Nongpoh, Jymmang 10: Ha ka jingleit jurip u MLA ka Jirang Constituency, u Bah Sosthenes Sohtun hynin ka sngi ïa ka shnong Nongwah Mawtamur halor ki kam pud ki kam sam shuwa ban ïa pynbeit ha ka wat kaba ar hapdeng ka sorkar Meghalaya bad ka sorkar Assam, ki nongïalam shnong bad ki riew rangbah katei ka shnong ki la kyrpad jur ïa u MLA ba ïa kren sha ka sorkar jylla na ka bynta ban siang rong noh ïa ka surok ban pynïasoh sha katei ka shnong Nongwah Mawtamur.
Kum ban pynkynmaw, u MLA ka Jirang Constituency, u Bah Sosthenes Sohtun ha ka sngi Balang jong ka taiew u la leit ban jurip ïa katei ka shnong na ka bynta ban ïa kynduh ïa ki nongïalam shnong bad ki rirew rangbah halor ki kam pynbeit pud pynbeit sam ba katei ka shnong ruh ka hap ha ka thup jong ka jingïakjia pud, hynrei lyngba jong kane ka sngi u MLA u la ioh pdiang pynban shibun ki jingkyrpad ban wan rah ïa ki kam pynroi ha kaba ka surrok ka dei kaba hakhmat eh nalor kiwei ki kam pynroi.
Kumba la pynpaw da u Bah Dwen Lyngdoh bad u Bah Useful Lakhmie kum ki riew rangbah ka shnong, nalor kiwei ki kam pynroi, kaba ki angnud bha ka long ban siang rong noh ïa ka surok na Mawpnar sha Nongwah Mawtamur ha ka jingjngai kumba 3 ne 4 km bad kumjuh ruh ba shna ïa ka jingkieng ban ïaid lyngba ka wah Umthna kaba ki shitom bha ha ka por lyiur ban ïaid ban ieng ba ki Kali ki motor ki hap ban ïaid lyngba katei ka wah.
Kawei ruh kaba ki la kyrpad jur ban pynioh ïa ka surok, ka dei namar ba ki mad ki jingjynjar ha ka leit ka wan bad khatam haka pang ka shitom bad ban pynpoi ïa ki mar rep sha ki iew ki hat lynga ka surok khlaw bad ka surok khyndew kaba tang ha ka por tlang ki lah ban pyndonkam bad ha ka por lyiur pat ki shem jynjar ba ym lah ban ïaid ki Kali ki motor.
Halor kane ka jingud jingnam ki nongïalam shnong, u Bah Sosthenes Sohtun kum u MLA katei ka thaiñ u la kular ba un sa shim khia ban ïa kren sha ka sorkar bad ban thaw ïa ki lad ki lynti na ka bynta ban pynioh ïa ka surok kaba long ka jingai mynsiem ïa ki paidbah nongshong shnong bad ki nongïalam Shnong katei ka shnong Nongwah Mawtamur, kaba dei ka shnong ba hap ha ka jingïapynbeit pud hapdeng ka sorkar Meghalaya bad ka sorkar Assam.
