Kubur ka HC ba tang ki bos skul kiba lah ban weng ïa ka jingdheng kali ha sor, ïaroh ïa ka sorkar

Shillong, Jymmang 11: Ka High Court (HC) of Meghalaya ha ka sngi Palei ka la kubur ïa ka kaiphod ba ka sorkar jylla ka la aiti sha ka kashari na bynta ban weng ïa ka jingdheng kali jong ka nongbah Shillong kata ka dei beit ban wanrah noh da ki bos skul ban leit shaw bad leit on ïa ki khynnah skul ha jaka ba kin pydonkam da ka kali shimet,
Ha ka hukum ba la pynmih ha ka sngi Palei da ka kashari jong ki arngut ki nongbishar kata u Chief Justice (CJ) ka HC u Justice Sanjib Banarjee bad u Justice W Diengdoh ki la ai jingïaroh ïa ka sorkar ha kaba ïadei bad ka sienjam ka sorkar ka la lah ban thied ïa ki bos tang ha ki khyndiat por a bynta ban kit ïa ki khynnah skul.
“Kat kum ka kaiphod ba la aiti la kdew ba ka sorkar ka la thied ïa ki bos skul ban kit ïa ki khynnah skul ha jaka ba kin pyndonkam da ki kali shimet, wat la kumba long mynta ki bos ki la don hynrei ki kmie ki kpa bad nongsumar ki pynpaw ïa ka jingsngewkhia ïa ka jingshngaiñ ki khun ki kti lada ki pyndonkam da kine ki bos. Na ka liang ka sorkar ha ka kaiphod bad kumjuh kum ba paw ha ki lad pathai khubor ba ka sorkar kan pyndait da ki kor CCTV bad kumjuh ka la pynphriang ïa u Mobile App ba ki kmie ki kpa bad nong sumar kin lah ban peitngor kaei kaba jia hapoh bos, ne ka bos ka la poi shaei bad ka jingsngewkhia ïa ka jingsngaiñ lehse da kane ka sienjam la lah ban weng,” ong ka hukum.
Ha kawei pat ka liang ka HC ka la ai jingmut ban wad da kiwei pat i sienjam ban weng ïa ka jingkhapngiah ka surok da kaba shna surok thymmai, ne ki Parking Lot ne ban pynlong one way ïa ki katto katne ki surok,
“Lada ka flyover kaba ka sorkar ka tyrwa ban ei ha ki bynta ka Rilbong bad Jhalupara lehse ka jingkhapngiah ka surok kaban rung sha Shillong yn lah ban weng bad ngi kyntu ba ka sorkar kan bteng ïa kane ka sienjam ba bha,” ong ka hukum.
Lah ban sakhi ba haba shim bishar ïa kane u Chief Justice u la ai jingïaroh ruh ïa ka sorkar ha kaba ïadei bad ki sienjam ba ka shim, ‘ngi pyrto ïa ki kam ka sorkar haba dawa ka kam bad kham bunsien hi ngi sakhi ba ka don ka jingkynthoh hynrei haba dawa ka kam ngi ïaroh bad haba dawa ban kynthoh ngi kynthoh bad sngewbha pynpoi ïa kane ka khubor sha ka sorkar ba ngi pyrto ïa ka sienjam ka sorkar,” ong u Chief Justice ïa u K Khan u muktiar ka sorkar jylla.