Thaw polisi ban ïarap ïa ki samla pule baduk: HITO

0

Shillong, Jymmang 11: Ka Hyñniewtrep Integrated Territorial Organization (HITO) ha ka sngi Balang ka la dawa ïa ka sorkar jylla ba kan wanrah da ka aiñ ne polisi ban ai jingïarap ïa ki samla pule kiba wan na ki longïing kiba duk ha ka dur jong ka baibam ne scholarship khnang ba kin dup lah ban bteng ïa ki jingpule ha ki kyrdan kiba kham shalor.
Haba kren sha ki lad pathai khubor hadien ba la dep ban ïakynduh ïa u Symbud Myntri Rangbah ka jylla u Bah Sniawbhalang Dhar, u President ka HITO u Bah Donbok Dkhar ula ong ba hadien ka jingpynbna Result ka MBOSE, ka seng ka la lap ba ki don katto katne ngut ki samla pule ki bym lah shuh ban bteng ïa ka jingpule namar ba ki kmie ki kpa kim lah shuh ban kyrshan ïa ki, ‘dei na kata ka daw ngi ai jingmut ba ka sorkar kan wanrah da ka polisi ban kyrshan ïa kiba kum kine,’ u la ong.
U la ong ba ka seng kala shim ïa ka jingkitkhlieh ban dawa naka sorkar jylla ba kan thaw daka Polici lane da ka Education Scholarship bad ban bsuh ïa kane ha ka State Education Policy ban kner jingïarap sha ki khynnah kiba wan na ki longïing kiba duna ha ka ïoh ka kot ba kin lah ban phah bteng pule ïa ki.
U Bah Donbok ula ong ba na ka liang u Symbud Myntri Rangbah u la kular ban pynsngew ïa kane sha u Myntri Rangbah ka jylla.

Leave A Reply

Your email address will not be published.