Ym baroh ki nong Jaiñtia Hills kidei kiba bieit pisa por elekshon: Bah Ardent

Noh synñiang ka Moorathud sha ka VPP

0

Nartiang, Jymmang 11: Wat lada ki ju mih ki jingkynthoh ba ki nongthep vote jong ka Jaiñtia Hills kidei kiba bieit pisa bha ha ka por elekshon. Hynrei ki paidbah jong ka Shnong Moorathud, kaba hap ha Nartiang Constituency kila pynpaw ym baroh ki Khasi Pnar ki long kumta.
Ha ka jingïalang ‘Clean Politics Campaign’ ba la pynlong da ka Shnong, ki paidbah hadien ka jingpynshai u Bah Ardent Miller Basaïawmoit, Nongsdang ïa ka Clean Politics Campaign bad u President ka VPP, ki paidbah ki la ïamih shakhmat ban noh synñiang sha ka VPP kum ka dak ka jingkyrshan ïa ka Party ha ka jingïaid lynti jong ka ban shakri ïa ka ri bad ka jaidbynriew lyngba ka saiñ hima sima.
Ki nongïalam Shnong ki la pynbeit lypa ïa kane ka jingnoh synñiang sha ka VPP namar ki sngew ba kane ka Party ka la ïalam ha ka lynti kaba dei ban pynsngewthuh ïa ki paidbah ba ka politik kam dei ka kam kaba jakhlia, hynrei kadei ka kam kaba kyntang bad kaba ki paidbah kim dei ban kheiñ string ne pynlong kum ka tamasa. Hadieb ba la wai ka jingïalang ïa kane ka pisa la aiti da u Rangbah Shnong ha u Bah Ardent Basaïawmoit.
Haba ai ka jingpynshai ha kane ka jingïalang, u Bah Ardent u la ong ba ki paidbah kim dei shuh ban shah ïalam bakla ba ka Politik kadei ka kam kaba jaboh lane ba ha ka politik u ksuid bad u angel ki ïaid ïaid lang. U la ong ba ka politik kadei ka kam kaba kyntang ïa kaba la buh beit U Blei naduh hyndai hynthai ba kan don ka jingsynshar kaba ïaid beit ïaid ryntih naduh ka jingsynshar ha ki shnong ki thaw haduh ka jylla bad ka ri hi baroh kawei. Hynrei da ka jingïalam bakla ki politician kiba don ha ki Party bapher bapher ban pynbieit ïa ki paidbah, kiba bun ki la shim ba ka politik kadei tang ka kam tamasa ban ïakhawai bam, khawai kyiad, sam pisa bad kiwei kiwei de, khnang ba ki paidbah kin ym sngewthuh shuh ïa ka kamram jong ki kum ki nongjied, hynrei ba kin long tang kita kiba shah thied kum ki masi ki blang bad kyrshan beit tang ïa kita kiba lah ban khawai bam, khawai kyiad, sam pisa bad kiwei kiwei de ki jingpynbieit.
U la pynshai ba ki paidbah ruh kidei ban tip ïa la ka jong ka hok kaba kidei ban ïoh na ki nongmihkhmat namar ba ka sorkar ka la mang shi snem shi snem haduh 1337.5 lak tyngka man la u MLA ban sam sha ki paidbah na ka bynta ka roi ka par bad kiwei kidei ki jingdonkam jong ki. U la ong ba u MLA kiba ki jied, ki dei tang ki shakri, kim dei satia ki kynrad jongno jongno.

Leave A Reply

Your email address will not be published.