Aiti noh ïa ki BSF pynïap briew, siew bai luksan bad Police Outpost, dawa ki RS Border Riwar Mihngi

Shillong, Jymmang 11 : Baroh ki Rangbah Shnong ha ki shnong khappud jong ka Pynursla ki la kynduh lang hynne ka janmiet ha Pongtung hadien ba ka MDC ka thain ka la khot ïa ka jingkynduh lang ban ïa kren halor ka jingsiatïap jong ki BSF ia uwei rangbah dang shen ha Mawshun
Haba kren bad ki lad pathai khubor hadien ka jingïalang, ki Rangbah Shnong da kawei ka sur ki la pynrem jur ïa katei ka jingsiat ïap jong ki BSF bad dawa ruh ba ki bor sorkar jylla ban leh da kaba tyngeh.
“Ha ka jingïalang ngi la rai ba lyngba i MDC jongngi ban rah ka ka khubor sha ka sorkar lyngba u Symbud Myntri Rangbah ka Jylla Bah Prestone Tynsong ba bat ïa ka tnad Kampohiing ka jylla ban dawa ba dei ban kem mardor ïa ki BSF ba siat ïap ïa u Bah Ronding,” ong u Bah SL Kongwang uwei na ki Rangbah Shnong.
Utei u rangbah Shnong u ong ruh ba ha ka jingshisha ki BSF ki dei ki nongïada jong ki paidbah hynrei ha ka jingjïa dangshen ha Mawshun ka la long pynban mar khongpong.
“Na ka liang jongngi ki Rangbah Shnong ngi dawa ba dei ban kem noh mardor ïa kine ki BSF bad ba ki dei ban don ha kti jong ki pulit Meghalaya,” bynrap shuh shuh u Bah SL Kongwang.
Ha kajuh ka por ka jingïalang ka dawa ruh na ka sorkar ba kadei ban siew ïa ka bailuksan sha katei ka longiing kaba mad ïa ka jingjïa ba sngewsih. “Lada ka long ha kano kano ka rukom ruh ka sorkar kadei ban ai noh kham kloi ki jingïarap sha katei ka longiing namar ngi la ïohi lyngba ki ad pathai khubor ba ki dei na ka longiing kaba duk bad ki donkam kyrkieh ïa ka jingïarap.”
La ïathuh ruh ba ka jingdon ki BSF mynta kam dei shuh ka jingshngain ïa ki shnong khappud namar dei ma ki hi ba pyndik ïa ka ïaid ka ïeng jong ki paidbah haba ki wan iew wan hat ne ki wan na ki kam ki jam.
“Ngi da kyntu jur ïa u Symbud Myntri Rangbah ba dei ruh u MLA na kane ka thain ban pynduna noh ïa kane ka jinglong sniew jong kine ki shipai. Bad lada long kumno kumno ruh ngi na ka liang ka Dorbar Shnong ngin ym lah ban shu peit ne shu sngap jar,” u la bynrap shuh shuh.
Ka jingïalang ka la rai ruh ban kyntu ïa ka sorkar ba kan tuklar lang noh khnang ba kitei ki bor pahara ba kin ym tur wat ki shnong kiba ym hap shuh ha khappud. La ïathuh ba kitei ki ju poi ruh wat sha Langkyrdem lane wat sha Pynursla ruh.
Kawei pat kaba ki dawa ka long ba namar ba katei ka thain ka la ïar bha namar ka dei naduh Laitlyngkot haduh Umsyiem ki pulit kim lah shuh ban peit kumta lyngba ka MDC ki kyntu ïa ka sorkar jylla lyngba u Symbud Myntri Rangbah ban ai noh da ka Police Outpost ban wanrah biang ka jingshngain ïa ki paidbah bad ba ki BSF kin ym lah ban leh mon bad shim kabu than.
Na ka liang ki Rangbah Shnong ki la pynpaw ruh ka jingsngewnguh ïa ka MDC kaba la shimkhia ban lumlang ïa baroh ki Rangbah Shnong na ka thain khappud baroh kawei hapoh ka lama jong ka Border Riwar Mihngi.
Shwa kane, ka MDC thaiñ, Kong Grace Kharpuri ka la ïathuh ba ka la lum ïa katei ka jingïalang hadien ba ka ladep ban syllok bad u MLA ka thain Bah Prestone Tynsong ba dei ruh u Symbud Myntri Rangbah ka Jylla hadien ba ka thain ka la khihwin na ka jingshah siat u Bah Ronding Nongkynrih ha ka taiew ba la dep ha Mawshun.
“Na ka liang i MLA ba dei ruh i Symbud Myntri Rangbah ka Jylla i la dep ban shimkhia ïa kane ka kam bad mynta i dang ap ïa ki BSF ban aiti noh ïa kitei kiba donkti sha ka Police Department,” ong ka MDC ba bat ruh kum ka Executive Member ka KHADC haba kren bad ki lad pathai khubor hadien ka jingïalang kaba long ha Pongtung.
Ka MDC ka la ïathuh ruh ba ha katei ka jingïalang ki Rangbah Shnong ryngkat bad ka kum ka MDC ki la shim ïa ka rai ban dawa na ka sorkar ba kan weng lut noh ïa ki BSF ba kin ym rung lut ki shnong ki thaw hynrei ba kin peit ïa ka khappud kumba ka dei ka kamram jong ki.
“Ki BSF kim dei ban long ki nongshun jong ki paidbah ha ka thain jongngi. Ha ka jingïakren bad ki Rangbah Shnong ki la pynpaw ka jingsngewkhia halor ka jingpyndik palat ki BSF. Bapli ki nong leit iew leit hat haba leit thied leit pet na Pynursla namar kat ban poi ha shnong ki la talasi ki la kem bad kane ka long beaiñ. Ki dei ban peit ban khmih ïa kiba long beain ïa kata ngim ong ei ei hynrei ym dei ma u ban leh beain ban shim beain ïa ka mynsiem jong i Bah Ronding bad mangi mynta ka janmiet ngi pynrem jur ïa kata,” ong ka MDC.
Na ka liang katei ka nongmihkhmat ka la pynpaw ruh ba ki dawa na ka sorkar ba kan siew ïa ka bailuksan sha ka longiing jong u Bah Ronding kaba la duh noh ïa u nongkamai.