Nongpoh, Naitung, 30: Ka Synjuk ki Rangbah Shnong (SRS) Ri-Bhoi District, ka la takraiñ tyngeh bad ha kajuh ka por ka la pynpaw ïa ka jingsngewkhia kaba jur halor ka jingleh mon jong ki shakri Sorkar ha kaba bun na ki paidbah ki la ïa kynduh mawsiang ban pyndep ïa ki kam ki jam khamtam ban beh ïa ka por ba kordor.
Na ka liang jong ki nongïalam ka Synjuk ki la pynpaw ba ki don ki ophis Sorkar kiba bym don briew wat ha ki kynta long trei kata naduh 10:00 baje mynstep haduh 4:00 baje janmiet, don ruh ki ki nongtrei kiba poi sha ki ophis treikam haduh ka por shiteng sngi bad leit phai noh tang hadien kumba katto katne por ba la poi trei watla ka Sorkar ka la siew da ka tulop ïa ki ban leit trei man ka sngi bad ka por ba la buh kaba la ktah ïaka ïoh ka kot ka jylla khamtam ha ka district Ri-Bhoi kaba la tip kum ka Aspirational District.
Kane ka jingkynthah jong ki nongïalam ka Synjuk pyrshah ïa ka jinglehmon jong ki shakri Sorkar ka long hadien ba ki la kam ba ki la lap ba bun na ki shakri Sorkar ha ki tnad treikam bapher bapher ki la shimkabu shaba palat ban wan trei bad leit phai katba ki mon kat haduh ba ka la buh jingeh ïa kiba bun ki riewpaidbah khamtam kum ki ophis Sorkar kiba dei peit ïa ka roi ka par.
Ka Synjuk ka la kynnoh ruh ba kine ki daw ki pynlong ïa ka jinghiar jong ka jylla sha ka kyrdan ba sha trai ha ka liang ka roi ka par bad ha ka ïoh ka kot.
Ka synjuk ka la kyrpad ïa baroh ki Ophisar bad ïa ki nongtrei Sorkar ba ki dei ban pynbiang ïa ka por leit trei bad ka por leit phai iing ka jong ki khnang ba yn dup lah ban pyndep bad ban shakri hok ïa ka kamram kumba la bynshet ha ki.
