Hap don bun ki Professor, ki Lecturer bad ki jingtei lada treikam ka NEP

Shillong, Naitung 30 : U Myntri Rangbah ka Jylla Conrad K Sangma u la ong ba ka sorkar jylla ka kloi ban ïarap bad kyrshan ïa kito ki college kiba shem jingeh na ka bynta ban pyntreikam ïa ka National Education Policy (NEP) kaba thymmai ha ka jylla.
Haba kren bad ki lad pathai khubor, u Myntri Rangbah u la ong ba kam don satia kano kano ka jingpyrshah ïa ka NEP hynrei ka jingkylli kaba mih ka long kumno ban weng ïa ki jingeh bad kata kadei ha ka liang ka jinglut.
“Ka daw balei balei ki jingeh ki mih kadei namar donkam haduh saw snem ban pyndep ïa ka snem pule bad kumta donkam shuh kham bun ki jingtei, donkam shuh khambun ki briew bad ruh ban sdang sa ïa ka multi-discplinary course. Kumta donkam kham bun ki professor, ki lecturer bad ki riewshemphang ban wan bad kam dei satia ba ki pyrshah ïa ka,” u la ong.
Katkum ka jingong jong u Myntri Rangbha, ki college shimet kin ym lah ban pyntreikam ïa ka NEP mardor mar ïa sdang namar ka jingeh kadei naduh ka jingdonkam kham bun ki briew, ka pisa bad ki jingtei.
“Kumta, ngi la ïa kren ïa kane bad bun ki college bad ngi la ïakren ruh ban ïarap bad kyrshan ïa ki. Kan ym lah ban long noh shisien long b aroh namar ka jingdonkam pisa kadei kaba bun hynrei ngi buh pat ka thong ban pyndep ïa ka bad ngin ïaid shakhmat,” u la bynrap biang.
UMyntri Rangbah u la ong ruh ba ki riewshemphang bad ki college ruh ki ïaroh ïa ka NEP bad pynpaw ba kane kadei ka sienjam shakhmat ha ka liang ka pule puthi kaba don jingmut namar kan plie lad ïa ki samla pule sha ka lawei kaba don jingmut.