Shillong, Naitung 30 : U President jong ka All India Trinamool Congress (AITC), Bah Charles Pyngrope u la pynpaw ba ïa mynta ka dang eh ïa ki kum ka party ban rai ïano kin sei kyrtong ban aireng ha kane ka elekshon MP Lok Sabha kaban sa long shen ha u snem ban wan.
Ka daw tynrai halor kane, kadei namar ba ka party kam shym la lah ban leh bha ha kane ka elekshon MLA kaba dang shu dep mynta u snem.
Lah ban kdew hangne ba ka AITC ka la ïoh ban jop tang san ngut ki MLA ha ka Iing Dorbar kaba don 60 ngut, kata saw ngut na rilum Garo bad uwei na rilum Khasi kata ruh tang u President ka party marwei u ba jop.
“Ngim pat pyrkhat ei ei halor kane, kumba phi ihi ba ngim shym la lahban leh bha ha ka elekshon MLA kaba dang shu dep khamtam ha rilum Khasi bad Jaintia. Kumta kan dei kaba eh ban shim rai mynta,” la ong u President uba dei ruh ha kajuh ka por u MLA ka Nongthymmai.
Hynrei haba jubab la ka party kan kyrshan ïa kino kino ki party kiba sngewthuh jingmut, na ka liang u President u la pynpaw da kaba ong ba ïa kane ka bynta ruh kin sa shim rai ynda la dei ka por.
