Shillong, Naitung, 30: Ki dkhot jong ka Khasi Students Union (KSU) West Jaiñtia Hills District Unit ha ka sngi Saitjaiñ ki la noh jingïarap da ki tip sop iing sha ka St. Tomas Lower Primary School kaba don ha ka shnong Moolber.
Ïa kine ki tin sop iing la aiti da u Vice President ka Seng u samla Chanbor War, u Vice President jong ka KSU Laskeiñ Circle u samla Phrang Law bad kiwei kiwei ryngkat ka jingdon lang ka trai jong ka skul ka Kong Minphik Laban bad ki bahaiing hasem.
Kane ka skul ka la ai ka jingshakri la 10 snem tam ha ka shonng Moolber kaba don markhap bad ka Jylla Assam. Ki don 6 ngut ki bonghikai bad 85 ngut ki khynnah skul kiba pule naduh ka klas KG haduh klas VI.
Na ka liang seng ka la kitbok kitrwiang ïa ka Kong Minphik Laban kaba la kloi ban mih shakhmat ban seng ïa kane skul kaba ai ka jingkyrkhu ïa ki heprit ki ban ïoh ïa ka jingnang jingstad ha kane ka thaiñ na kane ka skul.
Kum ka trai jong ka skul ka Kong Laban ka la pynsngew ïa ki jingeh ban pynïaid ïa kane ka skul namarba ka bai skul ka long kaba tad katba ka jingpynlut pat ka bun bha ba kynthup ïa ka jingsiew tulop ïa ki nonghikai.
Ka la ong, da ka ai mynsiem jong ka KSU, kan long ka jingkyrkhu ïa kane ka skul bad ïa ka thaiñ hi baroh kawei bad ha kajuh ka por ka la kitbok kitrwiang ïa ka KSU ba kan dang lah ban ai jingshakri kham bha ïa ka ri bad ka jaitbynriew hi baroh kawei.
