Nongpoh, Naiwieng 17: Ka jingther jong u slap baroh shi sngi na ka jingkylla kynsan ha ki bor ka mariang, ki bor pynïaid jong ka tamasa Cherry Blossom ki la hap ban pynsangeh lut ïa baroh ki prokram ha ka sngi sdang jong kane ka tamasa ba la pynlong ha madan Kurkalang, Bhoirymbong ha Ri Bhoi District.
Kane ka tamasa kaba lai sngi ban sa pynkut ha ka sngi U Blei, la hap ban pynsangeh lut ïa baroh ki jait prokram ha kane ka sngi sdang kynthup naduh ki nongput nongtep bad ki nongrwai.
Kumba la pynbeit da ki bor pynïaid, ha kane ka sngi sdang jong ka tamasa, ki kynhun nongrwai bapaw kiba thmu ban pynlynguh ha ka sngi sdang ïa kane ka tamasa ki kynthup ïa ka kynhun nongwai Sanam Sanam, Hybrid Theory, Kenny Musik, 4th Element, The Band Phantasm, DBRYN, Gwyneth, Dalariti, CYCO, Aminio, Dr Legend, bad Chevinia bad kine ki riew don sap ha ka rwai ka siaw ki la hap ban sangeh noh.
Kumba la pynpaw ha ka jingpyntip paidbah da ki bor pynïaid, la ong ba ka daw ba la hap ban pynsangeh shuwa ïa kane ka tamsa bad baroh ki jaid prorkam ha kane ka sngi sdang ka tamasa ka dei ka jingbym shngaiñ na ka jingkylla kynsan ha ki bor mariang bad ban lait na kino kino ki jingjia ba sngewsih ïa ki nongwan shim bynta ha kane ka tamasa.
Ki bor pynïaid, ki la pyntip paidbah ba kito kiba ladep ban thied tiket ban leit sakhi ha kane ka sngi sdang ka tamasa yn ailad ba kin ïashim bynta la ka dei ba ki kwah ban ïashim bynta ha ka sngi babud ne ha ka sngi ba la pynkut ïa ka tamasa kata haduh ka sngi u Blei.
Ki bor pynïaid jong ka tamasa ki la pyntip ruh na ka bynta ka Season Pass Holders ba kin sa pynphai biang ïa ka pisa ba ki paidbah ki la thied kaba ïa ryngkat dor katkum ka prokram ba mynta ka sngi lyngba ka RFID Card.
Halor kane ka jingpynsangeh noh ïa kane ka sngi sdang jong ka tamasa ïa baroh ki jaid prokram ym dei tang ki bor pynïaid ka tamasa Cherry Blossom kiba hap ban pyrkhat na ka bynta ka jingshngaiñ jong ki nongwan shim bynta, hynrei wat ka India Meteorological Dadpartment (IMD) ka ladep ai lypa ïa ka jingmaham ba kan don ka jingpynthud jong ki bor ka mariang kum ka eriong bad ka jingjur u lapbah kaba lah ban ktah ïa ki bynta jong ki jylla Shatei Lammihngi ka ri India.
