U Chairman lane u General Secretary ka HNLC kin ym lah ban ïashim bynta ha ka jingïakren

Shillong, Naiwieng, 17: Ka seng kieng atiar Hynñiewtrep National Liberation Council (HNLC) ki la pynpaw katba ka Sorkar kam pat weng lut ïa ki mukotduma pyrshah ïa ki nongïalam lane katba ym pat ïasoi ïa ka soskular sangeh ïasiat, u Chairman lane u General Secretary jong ka HNLC kin ym lah satia ban ïashim bynta ha ka miej jingïakren.
“Ïa mynta ka jingsdang jong ka jingïakren ka la ïaid hapoh ka jingïalam jong u Vice Chairman barim jong ngi. Hynrei, ka Sorkar ka la ïaiban ïa ka jingïashim bynta lang jong u Chairman bad u General Secretary. Ngi la kren da kaba shai katba ka Sorkar kam pat weng lut ïa ki mukotduma pyrshah ïa ki nongïalam lane katba ym pat ïasoi ïa ka soskular sangeh ïasiat, u Chairman lane u General Secretary jong ka HNLC kin ym lah satia ban ïashim bynta ha ka miej jingïakren,” la ong u kyrwoh ba la soi da u Chairman cum C -in- C Bah Bobby Marweiñ bad u General Secretary cum Publicity Secretary ka HNLC u Bah Saiñkupar Nongtraw ba la phah sha ki lad pathai khubor.
“Ngi la bynshet ha u Vice Chairman ba thymmai u Bah Teimiki Laloo, ban peit ïa ka kam kumno ban pyntyllun shakhmat,” ong u kyrwoh.
“Ka HNLC ka kwah ban don ka jingïakren bad ka Sorkar India na ka bynta ban pynneh pynsah ïa ka shongsuk shongsaiñ. Ngi ngeit skhem ba ka rai ka dei ban long na ka bynta ban pynneh ïa ka jingsuk. Namarkata, ka rai jong ka jingïakren ïasuk kam shym la paw katkum ki kyndon ba la ïa mynjur. Lada dang pynjari ïa ki kyndon, dei ban mynjur ruh da ki arliang mamla ym ban shu hukum tang na kawei ka liang,” la ong shuh shuh u kyrwoh.
“Ka jingïakren ïasuk ka thmu ban wad ïa ka lynti lyngba ka jingïakren bad ka jingïatreilang. Hynrei i kumba ka Sorkar India ka shim pynban ïa kine ki jingïakren ha ka rukom ban pyndem wait,” la kynthoh ka HNLC.
“Ka long kaba donkam ban tip ba bun na ki kynhun kieng atiar ha ka thaiñ Shatei Lammihngi ki ladep wan pyndem bad ki seng jong ki, ki la shah khang. Watla katta kim shym la ïohi ïa ka jingsuk kaba neh. Ka jingbym bat ïa ka soskular ka la pynkha thymmai ïa ka kynhun kieng atiar, kaba la nang kham pynsniew shuh shuh ïa ka jinglong jingman. Ha India, ïa ka NSCN la pdeng da ka jingïasoi ïa ka Shillong Accord 1975, bad ka ULFA ka la mih ha ka jingïakhih kaba jur ha Assam (1979-85) kum ka jubab ïa ka jingeh kaba la mada ki paidbah Assamese. Haba ka Assam Accord of 1985 ka la phiel ban pynurlong ïa ki jingangnud, ka ULFA ka la ïohbor bad long ka kynhun kaba khlaiñ ha ka jingïaleh pyrshah ïa ka Sorkar India. Lada ka Sorkar ka angnud shisha ïa ka jingsuk kaba neh, ki dei ban leh da kajuh ka lynti kumba ka leh ïa ka Mizo Accord 1986,” la ong shuh shuh ka HNLC.
“Ngi angnud ïa ka jingsuk kaba neh kaba pynlaitluid bad ïa ka hok da kaba burom ïa ka jingsngew bad ka jingangnud jong ki paidbah Hynñiewtrep. Ngin pyrshah tyngeh ïa kano kano ka jingpyrshang ban wanrah ïa ka jingsuk kaba tang shipor kaba lah ban buh jingma ïa ka jingdon jong ngi ha ka ri bad ïa ka hok ban ïoh ïa la ka jong synshar ka khadar.