Shillong, Naiwieng 18: Ka long ka burom bad ka jingsngew sarong ïa ka jylla hi baroh kawei naba san ngut ki nongïakhun kiba la kynthuplang shynrang bad kynthei ki la leit ban ïashimbynta sha ka rynsan ïakhun kti ka dewbah Asia kaba la tip da ka Asian Cup 2023.
Kine ki nongïakhun kti kiba na kane ka jylla ki kynthup ïa ar ngut shynrang bad lai ngut kynthei, kata u Alan Sun Marbaniang bad u Kishore
Chettri, katba ki kynthei la lamkhmat da ka Wandalin Syiemiong, Airikmen Shabong bad ka Senibi Syngkli.
Baroh san ngut ki la mih na nongbah Shillong naduh ka Sngi Palei (16 tarik Risaw 2023) ban leit shimbynta sha kane ka rynsan ïakhun kti jong ka Asian Cup 2023 kaba la pynlong ha Samarkand, Uzbekistan bad ïa kane ka lympung la sdang naduh ka 17 tarik bad kan kut haduh ka 25 tarik mynta u Naiwieng 2023.
Napdeng kine u Alan Sun Marbaniang ryngkat bad ka Wandalin Syiemiong ki dei kiba la mihkhmat na ka Meghalaya Police, katba u Kishore Chettri, Airikmen Shabong bad ka Senibi Syngkli pat ki lah mih khmat na ka Meghalaya Arm Wrestling Association.
Na ka liang jong ka Meghalaya Arm Wrestling Association ka la ai khublei khadduh ryngkat bad ka jingkitbok kitrwiang ïa kine baroh 5ngut shuwa ba kin jam ïa ka lynti ban leit ïakhun sha katei ka rynsan kaba heh kaba ki nongïakhun kti na kylleng ki ri ka dewbah Asia kin ïa kynduhlang ban ïa aireng pyrshah.
Shuh shuh ka la ai mynsiem ruh ïa ki ban ïakhun tyngeh bad ban wanrah ïa ka nam bad ka burom na bynta ka jylla Meghalaya hi baroh kawei.
