Pyrshah ïa ka kynhun ba bat kyrdan nyngkong yn aireng ka Shillong Lajong mynta ka sngi hala ïing
Shillong, Naiwieng 18: Ka kynhun ïalehkai jong ka Shillong Lajong FC kan pynkhreh mynta ka sngi (19 tarik Naiwieng) ban pyndep ïa ka jingïalehkai hala ïing kaba lai sien kynthih pyrshah ïa ka Gokulam Kerala FC, ka ban sdang naduh ka por 2 baje nohphai sngi ha madan SSA Stadium, Shillong.
Hadien ba ka kynhun ka la bteng ïa ka lynti ïaid khlem ka namjop bad ha kajuh ka por khlem ka namrem haduh lai sien lynter, bad dang shen ka la ïakhaid bad ka Sreenidi Deccan FC da mar 2 kol, kaba dei kawei na ki kynhun ba bat kyrdan ba kham shakhmat ha kane ka I-League. Hynrei ha kane ka kynti pat ka Lajong kan hap ban aireng sa ïa ka kynhun kaba khlaiñbor shuh shuh kaba la rah ar sien ïa ka burom jong ka I-League, ka Gokulam Kerala kaba haduh mynta ka la bteng ïa ka lynti ïaid kaba seisoh, da kaba jop 3 sien bad ïakhaid shi sien.
Ka Gokulam Kerala ka kynhun kaba ka Shillong Lajong kan aireng mynta ka sngi, ka ïeng mynta ha ka kyrdan ba nyngkong da ki 10 point ba ka la ïoh khur na ki 4 sien ïakhun ba ladep.
Haba ai jingkren sha ki lad pathai khubor shuwa ban jam sha ka sngi ïakhun ba la pynlong hynne ka janmiet sngi Saitjaiñ, u head coach jong ka Gokulam Kerala, u Domingo Oramas u la pynpaw ba ka kynhun ka jong u ka don ha ka lynti kaba biang, bad ka khmihlynti ruh ban khur shalade baroh lai point mynta ka sngi pyrshah ïa ka Lajong ha kajuh ka por u la ai jingïaroh ïa ka Lajong kaba la ïakhun tyngeh bad ong ba ka jingïakhun ban khur ïa ki lai point kan nym long kaba suk.
Katba haba phai pat sha ka Lajong hadien ba ka la ïakhaid lai sien lynter ha ki jingïakhun ba ladep ka kynhun ka ïeng mynta ha ka kyrdan ba 10 jong ka miej da 3 point na ki lai sien ïakhun.
Na ka liang jong u head coach ka Shillong Lajong, u Bah Bobby Nongbet u la ong ba ka kynhun ka la ïalehkai bha ha ka jingïakhun kaba ladep watla ka kynhun ka la hap ban hun ïa ka shi point, bad u la kyrmen skhem ba baroh ki rangïalehkai kin bteng ban pynneh kajuh kla rukom bad ban ïakhun tyngeh naduh kaba sdang.
Ka Gokulam Kerala ka dei kawei napdeng ki kynhun ba la khmihlynti ban rah ïa ka I-League mynta ka samoi hadien ka jingseisoh jong kane ka kynhun kaba la ïalam da u head coach u ba na Spain, u Domingo Aramas.