Ym da don kam eh ban hikai ïa kiei kiei kiba sniew, hynrei ia kiei kiei kiba bha donkam ban da pynlut por bad duriap ban pynkhlain ia ki. Ka jingim ba man la ka sngi jong ki briew ka long kaba eh ban pyrkhat bad katta katba nanghikai ia kaba bha hynrei kaba sniew ka dang iai ioh jaka hi ha ka jingim. Naduh ba dang rit ki kmie ki kpa katlah katiai ki iai ban ia ki khun jong ki ban im ia ka jingim kaba bha bad ki pynlut bor pynlut sor ban pynioh ia la ki khun ia ki jinghikai kiba bha bad kiba lah ban kyntiew ia ka jingim jong ki khnang ba kin long ki briew kiba bha ynda ha ba ki la san. Wat ka Proverb ruh ka ong “hikai ia u khynnah ha ka lynti kaba bha khnang ba ynda haba u la rangbah un ym kynriah noh na ka”. Hynrei ym lah ban len ba ia ka jingsniew ym donkam ban hikai, pynban ka long kaba suk eh ban bud ia ka.
Bun na ngi ngim da buh jingkynmaw eh ia ki jingjia ha ka jingim jong ngi bad khamtam lei ia kiei kiei kiba bha bun sien ngi klet noh ia ki. Lada don mano mano ba la leh bha ia ki 99 sien hynrei ki leh bakla tang 1 sien ngi kloi ban klet lut ia ki jinglehbha baroh bad ngin niew pynban ba kitei ki jinglehbha ki dei tang ki buit phon ban ioh pynsniew tang shi sien. Lehse ki don shisha ki khep kiba kum kitei, bad kane ka jia hangno re hangno bad kane ka la long kawei na ki jingjia kiba pynduh jingkyrmen ia ka jingim jong ngi ki briew. Ha kine ki sngi ngi iohi ba ka long shisha kumta bad kiba bun ki peit bad kham bat pynban ia ka jingbakla ne ka jingduna jong kiwei bad kane ka pynlong ia kiba bun ban duh noh ia ki jingmyntoi kiba kham bha bun shah bad ia ki jingisih bad jingiabein iwei ia iwei pat.
Kawei ka jingduhnong jong ka pateng bynriew ka long haba ngi ia peit bad iathew palat ia ka jingbakla ne ka jingbymbiang jong kiwei. Kane ha ka jaka ba kan wanrah ia ka jingiatei bad jingmyntoi ka wanrah pynban ia ka jingjot jingpra ha ka long iing longsem bad ruh ha ka imlang sahlang. Kum kine ki kam ki dang iai jia wat ki jaka ba la niew ba kyntang bad ba kynja mynsiem ruh kumjuh ruh ha ki jaka ba la sah da ki briew kiba la nang la stad bad kiba la shai ruh, katno tam lei ha ki jaka kiba ka bor pyrkhat jong ki briew kam pat kot bad kiba dang im ha ka jingdum jong ka jingim. Kawei na ka jingeh kaba long ka daw ba kongsan jong kane ka dei ka rukom pyrkhat jong ngi shaphang kiwei bad ba ngi niew ia lade ba ngi kham bha ban ia kiwei.
Ha ka jingshisha ki briew kiba stad ki kham sngewthuh bad ki kham sngemphang shibun ban ia kiwei, hynrei katba nangstad ki don bun ki khep ba imat ki briew ki nang sarong bad nangbieit bad ki kut beit ha ka jingkwah ban pynbor ba ki khambha ia kiwei. Ha ka jingshisha ka jinghikai babha ka hikai ba kumno ngi dei ban niew ia kiwei pat ki kham bha ban ia ngi khnang ba kin lah ban khring ia ki sha lynti jong ka jingbha. Ka jingniew ia kiwei ba ki khambha kam dei eh ba ngi pyndem noh ha ki hynrei kane ka ai lad ba ngin lah ban nangrung kham shapoh jong ka jingiatei bad wanrah ia ka jingiasngewjan iwei ia iwei pat.
Kat kum ka bor pyrkhat paidbah hi ym don kiba kwah ban pyntroin ia kano kano ka jingpyrkhat babha ban tei ia ka lawei jong ka ri bad ka Jaidbynriew hynrei kane ka long kaba eh ban pyntreikam ha ka jingim kaba man la ka sngi. Hynrei kawei na ki ktien phira kaba ju ong ‘to leh ha kiwei kumba phi kwah ba kiwei kin leh iaphi’ ka long kaba donkam ban kynmaw khnang ba ngin long ki briew kiba pyrkhat jngai shuwa ba kin shim ia ka rai pyrshah iano iano khnang ba kin poi sha ka jingthmu kaba bha da kaba siew kylliang da kaba bha ia kaba sniew bad dei kane kein ka nongrim kaba ngin lah ban iatei iwei ia iwei pat. Namar la iohi ba ha kine ki sngi ka pyrkhat pyrdain hapdeng ki briew ka khim bha bad kim pyrkhat than eh ia kiwei hynrei tang ban pynkiew skong beit ia ialade. Kumta wat la ka jingsniew ka kham khring, hynrei ym dei ban ailad ia ka bad dei ban tem ia ka da ka jingbha. Lada shi sien ka jingpynphai kylla da kaba bha ia kaba sniew i kumba ka phiel, hynrei khlem pep ha kawei ki ka sngi ka jingbha kan jop beit ia kaba sniew bad kane kan wanrah ia ka jingkylla.
