Nongstoiñ, Naiwieng 18: Ka synjuk ki nongsynshar shnong jong ka thaiñ Maweit kaba kynthup ïa ki 46 tylli ki shnong, ha ka sngi thohdieng ka la pynkup burom kyrpang ïa u bah Gigur Myrthong MLA barim ka Mawshynrut konstitwensi ha kajuh ka por kum u MDC, halor ka nongrim kaba u la pynïoh ïa ka surok kaba 35 km na Nongstoiñ sha Maweit.
Ka Synjuk ka la ong ba utei u MLA barim u la lah ban pyndep kumba u la kular ha ki por elekshon, kumta ka synjuk kam lah khlem da leh burom ei ei, namar ka dei hok ba utei u MLA barim u dei ban ïoh wat haba u la rem.
Ha katei ka jingïalang ïa kaba la pynlong ha St.Mary’s School Maweit la ïadonlang ryngkat u bah T.Umïong president ka synjuk, u bah Sirbuss Langrin sordar shnong Maweit, bah Orius Thongni Secretary ka synjuk bad kiwei kiwei kiba dei ruh tang ki nongsynshar shnong.
U bah Gigur haba ai jingkren u la ong ka long kaba suk ban kren hynrei hadien ba la shim ïa ka lyngkor ka eh bha kum u Nongmihkhmat ban shim ïa ka jingkitkhlieh na ka bynta ka thaiñ. Hynrei, u kyrmen pat ba lyngba kane ka kam ba u leh kan long ka jingmyntoi na ka bynta ki paidbah ka thaiñ.
