Nongpoh, Lber 31: Ka eriong kaba jur ryngkat u slap bad u phria ka la khyrwit mynta ka sngi ha kiba bun ki bynta jong ka Ri-Bhoi bad ka thaiñ Jirang ka dei kawei na ki jaka kaba shah ktah jur kaba la wanrah ruh ka jingshah rat jong ki iing ki sem bad ki jingthung jingtep.
Katkum ka jingtip ba la ioh lum ka shnong Umsaliang bad ka shnong Umsalani ki dei ki shnong ba shah ktah jur haduh ba kawei ka longkmie ba la tip kyrteng kum ka Khuni Killing ka la mynsaw jur ha katei ka jingjia bad kumba 44 tylli ki longiing ki la shah ktah bad shah rat.
U nongthoh khubor u la ioh ruh ban ïakren bad u BDO ka Jirang Block u Dr Pabitra R Hajong ha kaba u la pyntip ba kane ka jingjia ka la jia ha ka por kumba 4 baje eiei ha ka janmiet Sngi u Blei haduh ba ki iing ki sem ki la shah rat lut bad ki dieng ki la khyllem hapdeng surok bad khang sbak ïa ka lynti ïaid. U BDO, ryngkat ki Pulit ka Rani Border Out Post ki la leit marmar sha kane ka jaka hynrei ki la sahkut ha lynti ban leit sha katei ka shnong namar ka jingkhyllem ki dieng.
U la ong ba u la bthah ïa ki nongshong shnong ban shong rieh shipor ha ki iing skul bad ha ka iing dorbar ha kane ka shnong ban lait na u slap bad ka lyer katba ka Sorkar ka dang wad ki lad jingïarap.
Kat haduh ba la thoh ïa kane ka khubor la ioh jingtip ruh ba ki dang don kiwei kiwei ki shnong kiba shah ktah jur ha ka eriong bad u phria kum ka shnong Nongrim Jirang bad kiwei bad na ka liang u BDO u dang lum jingtip ïa ki shnong ba shah ktah ha ka eriong bad ha u phria.
