Khliehriat, Lber 31 : U President Rangbah jong ka United Democratic Party (UDP), Bah Metbah Lyngdoh u la kyrpad ïa ki paidbah ba kim dei shuh ban pharia ïa ka jaibynriew ha ki rynsan bapher bapher tang na bynta ban pynksan ïa ki nongrim la jong.
Ïa kane u la kren ha ka jingïalang ïalap elekshon na bynta u kyrtong MP ba pynieng da ka Regional Democrativc Alliance (RDA) ba kynthup ïa ka UDP bad HSPDP, ha ka jingïalang paidbah kaba long hynne ka sngi ha Khliehriat.
“Baroh shi katta ki nongïalam ki ïai pyrta da kaba ong ynnai pharïa shuh la biang katto. Kumta nga ruh nga kyrpad ïa ki paidbah ba kim dei shuh ban pharia ïa ka jaidbynriew namar ka jaidbynriew jong ngi kam dei ka jaidbynriew heh paid,” u la ong da kaba kyntu ïa ki paidbah ba kin ailad mynta ka kynti ïa u kyrtong jong ka RDA ban long kum u MP ba thymmai ka Shillong Parliamentary constituency, Bah Robertjune Kharjahrin.
U Bah Metbah u la pynshai ruh ba dei na kane ka daw ba ka UDP bad ka HSPDP kiba dei ki party riewlum kiba la rim ki la wan lang ha kajuh ka rynsan ban ïa tylli ha kane ka elekshon MP da kaba sei tang uwei u kyrtong monlang.
Da kaba ai khublei ïa ki paidbah ka Khliehriat constituency kiba la pynjop ïa u kyrtong jong ka party ha ka elekshon MLA ba dei ruh u Myntri ha ka sorkar jylla mynta Bah Lahkmen Rymbui, na ka liang u President u la ong, “La arsien phi la pynjop donburom ïa u Bah Kyrmen Shylla kumta mynta ka kynti ruh to ailad ïa u kyrtong jongngi da kaba kyrshan ïa u ha kane ka elekshon sha ka Lok Sabha.”
Ha kajuh ka por u Bah Metbah u la kren ruh halor ka jingmih jong kiwei pat ki party riewlum kiba tang shipor ki la jah noh. U ong ruh ba kim tip wat kine ki party ba thymmai ruh katno kin neh. “Kam dei kaba suk ban thaw party thymmai donkam ban don ka nongrim bad haduh mynta ym pat don ka party thymmai kaba la don lypa ïa ki mat ba ynda ki la jop aiu kin leh hynrei ka RDA ka la don lypa ia ki mat treikam ba ynda ka la jop bad poi sha ka thong,” u la ong.
Ha kane ka sngi la ïoh ruh ïa ka jingkren na kiwei pat ki nongïalam ka party kynthup naduh ki MLA, MDC ka party kynthup naduh u Bah Kyrmen Shylla, Bah Jemino Mawthoh, Bah Lasky Rymbai, MDC Mookaiaw, u Bah W.G.Sungoh, ki MDC barim, u Bah Joinriwell Pyrtihm u bah Helping Phawa, u President HSPDP Youth Wing, u Bah Pynshairiwell Dkhar, u CEM barim u Bah Titos Chyne, u Bah Radiuis Lapasam bad kiwei kiwei, ïa ka jingïalang la pynïaid da u MDC Khliehriat, u bah F.Bareh.
