Shillong, Lber 31 : Ka Meghalaya sa shisien pat ka la paw biang ha ka jingdon ïa ki mar rep bad ki tiar ba kyrpang ba ka pynmih da ka jingïoh jingithuh ba la tip kum ka Geographical Indication tag ba ju tip lyngkot kum ka ‘GI tag’ haduh saw tylli ki tiar bad ki mar rep.
Kine ki kynthup ïa ka Garo Textile, Lyrnai Pottery, Meghalaya Chubitchi bad u shynrai Lakadong. Kine ki tiar bad ki mar rep ym tang ba ki pyni sha ka pyrthei ïa ka jingriewspah jong ka Meghalaya haka kolshor hynrei ki long ruh shi bynta ka jingïarap ban kyntiew ïa ka kamai kajih jong kumba 30,000 ngut ki longiing longsem kiba don bynta ha katei ka kam.
Ka jingai ïa katei ka GI tag ka pyni ruh ïa ka jingkordor ka jingpynneh pynsah ïa ka jingstad tynrai nalor ka jingpynkhlain ïa ka kamai kajih bad kyntiew ruh ïa ka ïoh ka kot ha ka thain.
Dei ha ka 30tarik mynta u bnai, ka Registrar of Geographical Indications, Chennai, ka la pynbna bad pynkup da ka jingithuh ne ka Geographical Indication tag No. 741 na bynta u shynrai Lakadong lyngba ka Journal No 185 Part 1 jong ka Government of India.
Kane ka la rah ïa ka burom ka jylla bad khamtam ïa ki nongrep ïa u shynrai Lakadong naba katei ka shnong ka la ïoh ïa ka jingithuh kum ka thymmei kaba pynmih ïa u shynrai uba bha tam ha ka pyrthei.
Ki lai tylli kiwei pat ki GI Tag ki dei ïa ka Garo Dakmanda (Meghalaya Garo Textile), Larnai pottery, bd ruh ka Garo Chubitchi kiba la ïoh jingithuh lyngba ka journal No 185 Part 3.
Kumban shu kdew hangne, u shynrai Lakadong u la wanrah ka jingkylla ïa ka jingim jong kumba 12,000 ngut ki nongrep bad kumba 20 tylli ki kynhun nongrep.
