Shillong, Lber 31: Ka Khasi Students Union (KSU)-Mawprem Circle ha ka sngi U Blei, ka la leit ban khang khyrdep ïa ki Bank kiba don ha ka thaiñ, namar ka jingpynlong trei ha kane ka sngi kyntang jong ki paid riewngeit Khristan kaba la tip kum ka Easter Sunday ne ka Sngi U Blei Paskha.
Ka KSU hapoh ka jingïalam u Organising Secretary u samla Banshan Lyngdoh, ka la lap ba baroh ki bank kila pynlong trei khlem da burom shuh ïa kane ka sngi khuid, sngi kyntang jong ki riewngeit Khristan hapoh ka Bri u Hynñiewtrep.
Halor kane ka jingshem, ka KSU ka la phah khang mardor ïa ki baroh ki bank bad hukum ba kim dei ban ïaleh pyrshah ne kheiñ dewthala ïa baroh ki sngi kyrpang jong ki kynhun niam kiba ki Khun Hynñiewtrep ki mane bad bud.
Ha kajuh ka por, ka KSU ka pynpaw ïa ka jingbitar halor ka jingkynnoh leh bym suitñiew ka Sorkar Jylla bad Sorkar India ban ai shuti ha kane ka sngi Kyntang bad sngi Khuid jong ki paid riewngeit Khristan.
Ka la ong ba ha kiwei ki jylla kum ka Manipur, Mizoram bad kiwei ki jylla shatei sha thaiñ lam mihngi ki ïoh shuti ha kum kane ka sngi kyrpang khlem da ai daw ïa kata ka Financial year.
Ha kaba khatduh na ka liang ka KSU ka kren da kaba shai sha baroh ki Bank bad ki Financial Institution ba kim dei ban kheiñ dew thala ïa ki sngi kyrpang u Hynñiewtrep bad ïa ki sngi kyntang jong ki Khristan khun Hynñiewtrep bad kiba leh pyrshah ïa kane ka Seng kan dang ïai mih madan ban ai shuti hi da kaba khang da ka bor.
Kane ka jingleit khang ka Khasi Students’ Union ka long pdeng ïa baroh lada ki leh pyrshah ïa ka jingsngew jong u Paid ka Bri Hynñiewtrep ngin ym aili da leilei ruh, ong ka KSU.
Ki tnat treikam bapher bapher jong ka KSU ha ka 31 tarik u Lber 2024 ka la leit ban pynai shuti hi ïa ki Bank bad kiwei kiwei kiba pynlong trei ha kane ka sngi kaba dei ka sngi kyntang jong ki Khun Kristan katta ka Easter Sunday.
Ha kane ka sngi na ka liang jong ka KSU ka la lap ba jan baroh ki Bank ki pynlong trei khlem da burom ïa kane ka sngi kyrpang, ha katei ka jingleit jurip na ka liang ka KSU ka la phah khang shi syndon ïa ki bank kiba plie. Ka Seng ka la maham ruh ïa kitei ki Bank ba kim dei ban ïaleh pyrshah ne kheiñ dew thala ïa ki sngi kyrpang jong ki Khristan.
Na ka Liang ka Seng ka pynpaw ba dei ka jingleh bym suidñiew ka Sorkar MDA lane NDA ïa ki paid riewngeit Kristan hapoh ka Jylla Meghalaya. Katba ha kiwei pat ki jylla kum ka Manipur, Mizoram bad kiwei ki jylla shatei thaiñ lam mihngi ki ïoh shuti ha kum kane ka sngi kyrpang, watla ka dei kata ka Financial year.
Kane ka jingleit khang khyrdep jong ka KSU ïa ki Bank ka kynthup naduh Mawïong, Mawprem, Stand Jeep, Garikhana, Upper Shillong, Mawkhar, Khyndai Lad, Barik, Malki, Laitumkhrah, Nongmensong bad ha kylleng ka Bri U Hynñiewtrep hi baroh kawei.
