Shillong, Lber 31: Ka Hynñiewtrep National Youth Front (HNYF) ka la ther tyngeh ïa ka Coordination and Welfare Committee (CWC) namar ka jingpynlong kam ïapher jaitbynriew halor ka jingshah pynïap ki arngut ki bar jylla ha Ichamati.
Ha ka kyrwoh, u President ka HNYF Bah Sadon Blah ula ong, “Katba ki Pulit ki dang tohkit ïa kane ka jingjia, kumno ka Coordination and Welfare Committee ka la shu kdew kti beit da kaba pynïasnoh ïa ka KSU bad ka jingpynïap ïa u Esan Singh bad Sujit Dutta”.
“Kane kum ka HNYF ngi sngew ba ka dei ka jingpyrshang jong ki ban wanrah ïa ka jingïa kynad pher jaitbynriew bad jing huri hura kaba ngin ym ailad satia,” ula bynrap.
U Bah Sadon ula ther tyngeh ruh ïa ka Meghalaya Linguistic Minority Forum (MLMF) namar ka jingai umphniang ïa ka ding da kaba pynbna paidbah ban pynlong ïa ka jingïashong kyllaiñ myngor halor ka jingshah pynïap kine ki arngut, kaba ha ryngkat bad ka CWC kila shim ïa ka bynta ban wanrah ïa ka jingïakynad jaitbynriew na ki kam bymman kiba shu jia ryngkhat.
“Kumta, ka HNYF ka pyrshah jur ïa kano kano ka jingpyrshang jong kum kine ki kynhun ban aiding ïa ka jingïakynad jaitbynriew hapoh ka Jylla da kaba leh ïa ki kam sngew ïapher jaitbynriew ki bym donkam satia, ïa kiba ka jaitbynriew Khasi ka la ïai long kaba jai jai pyrshah ïa ka jingshah pynïap ki briew jong ngi la ka dei ha khappud, sha siat ïap ha ki BSF ne ka jingshah bomïap u (L) Lurshai Hynñiewta,” ula ong.
“Ka jingthmu ban pynlong ïa ka jingïashong kyllaiñ myngor paidbah da ka Meghalaya Linguistic Forum ka dei ka jingkob pylleiñ pylleiñ ym tang ïa ka HNYF hynrei ïa ki paid riewlum trai ka Jylla. Kumta, ngi la rai ban pynlong ïa ka jingïakhih ha ka 7 tarik ïaïong, 2024 pyrshah ïa ka jingkynnoh ba ngi ki paid riewlum ka Jylla ngi dei ki nongpynïap ïa ki bar jylla,” ong u Bah Sadon.
