Lada ki nongshong shnong kiba donkam nongsaid aiñ, ka law college ka kloi, ong ki samla ka SLC
Shillong, Lber 31:Ki samla pule jong ka Shillong Law College (SLC) kila ïa wan ai jingpyntip bad jingpynsngewthuh (awareness) shaphang ka Child Rights ha St. Mary’s Higher Secondary School, ha ka 26 tarik u Rymphang (February) 2024 bad ha St. Anthony’s College ha ka 6 tarik u Lber (March) 2024.
Ka jingai jingtip ka la long kaba seisoh ha ka ba bun bah ki khynnah ki lah ïoh jinghikai bad jingtip halor ki hok bad ki aiñ kum ka United Nations Convention on the Rights of a Child (UNCRC) 1989, Protection of Children from Sexual Offences (POCSO) Act 2012 bad ka Juvenile Justice (JJA) Act 2015.
Ki nongai jingkren ha kito ki sngi ki long I Samla Clara Jones Jala, Samla Christina Bareh, Samla Kyrshan Lating, Samla Aiborlang G Marbaniang, Samla Shanbor Syiem, Samla Gulzar Borbhuiya, Samla Nagma Khatoon bad Samla Pynbhalang Nongsiej.
Ha kine ki program ba la pynlong da kane ka College ka la nang ai mynsiem ïa ki khynnah ban tip shuh shuh shaphang ka hok bad ka bor kaba ki don ha ka imlang ka sahlang.
Namar ki khynnah ki long ka lawei jong ka imlang ka sahlang, ki lah kloi ban ïarap ïa la ki jong ki hynmen, ki para, ki paralok ne kino kino kiba shah ban beiñ ha kiwei ne kibym don ka jingshemphang halor ka aiñ jong ki khyllung khynnah kiba hapoh ka 18 snem ka rta. Ki hi ki la long kiba kloi ban ïarap lem ïa kiba shem kum kine ki jingjia khamtam ha kaba ki khynnah kynthei/shynrang ki shah ktah kti. Kane ka la long ka kabu ksiar na ka bynta jong ki khnang ba kin sngewthuh kham bha shaphang kine ki aiñ.
Kumno yn lah ban ïada lane sumar ïalade ne ïa kiwei ruh haba ki ngat ne shem kum kine ki jingjia? Ka Legal Care and Support Centre kaba don ha Shillong Law College ka ai jingïarap ei na ka liang ka aiñ (Free Legal Services) ïa ki khynnah, ki kynthei bad kino kino ki baduk, kiba shem lanot, kiba donkam ïa kine ki jingïarap.
Ki lah ban wan sha college ban ïoh ei ïa ka jingïarap na ka liang ka aiñ bad kumjuh ruh ka jingïarap ban kyrpad nongïasaid aiñ (Free legal aid) na ka bynta ki mukotduma ha ki ïingbishar bapher bapher. Ki lah ban ïoh ka jingïarap kaba pura da kaba phone ha une u number +9197741 24283 /+919863665161 lane ha ka email shillonglawcollege@yahoo.com
Ka awareness program ka la long kaba jop shisha ha kaba bun ki lah ïoh ka jingmyntoi kaban ïarap ïa ka imlang ka sahlang bad kiwei kiba ïadon ka jingïadei bad ki. Ki ruh kin lah ban ai kajuh ka jingtip sha kiwei kiba donkam ïa kine ki aiñ.