Jowai, Lber 31: Ka tnad treikam jong ka District Tuberculosis Officer, West Jaiñtia Hills ha kane ka 28 tarik u Lber ka la kynmaw burom ïa ka World Tuberculosis Day haka jingïalang ba la pynlong ha District Library Auditorium, Jowai halor ka phang ba ong “Yes! We can end TB” ha ka jingdon lang u Deputy Commisssioner, u B.S. Sohliya kum u kongsan.
Halor kane u kongsan ula ai jingïaroh ïa ki Doctor kumjuh ïa ki nongtrei kiba ïaleh ban pynduna ïa ki briew ba don TB, bad ban ïaleh ban poi sha ka thong ban pynduh jait syndon ïa ka jingpang TB hapoh ka District. Shuh shuh ula sngewnguh ruh ïa kiwei kiwei kiba trei shitom ban bud dien ban wad ïa kiba ïoh pang TB da kaba ai mynsiem ïa ki ban treilang khnang ban poi sha thong.
U Deputy Commissioner ula pynlait paidbah ruh ïa kawei ka Music Video kaba ai jingpynsngewthuh paidbah shaphang ka jingpang TB, kumno ban ïada bad kamjuh ban sumar.
Na ka liang ka Dr. Evalyneda B V Laloo, District Medical Health Officer kaba long kum ka District Tuberculosis Officer bad DACO bad ka Dr. Dasngewhun Shadap, MOTC Jowai TU kila ban jur ïa ka thong bad ong “Yes! We can end TB” kaba mut lah ruh ban pynduh jait ïa ka jingpang TB.
Ka Dr. Evalyneda kala ong ban kynmaw burom ïa ka World Tuberculosis Day dei ban ïaleh ban ïa kren ïa kaei ba la lah ban pyntreikam bad ban pynduh ïa ka jingpang TB bad lah ruh ban ïada kumjuh ban sumar pynkhiah lada ki kloi ban pyni sha Doctor.
Ha kane ka jingïalang la sam ruh ïa ki khusnam ban pynithuh ïa kito kiba trei shitom ban ïada pynshah ban pynduh jait ïa ka jingpang TB bad kumjuh ruh ïa kane ka khusnam la kynthup ïa ka TB Free Village Award, SNC Certificate/Mementos, ka Nikshay Mitra Certificate, Best Treatment Supporter, Best lab Technicians, Best Performing ASHA bad Media Engagement.
Ha shwa kane la don ruh ka jingïalehkai Sports na ka bynta ki khynnah skul LP bad UP bad la sam ruh ïa ki khusnam sha kiba jop ha kane ka jingïalang. Ha ka por mynstep la sdang ïa ka jingïaid kjat da ki khynnah skul bad la rah ruh ïa ki Placard ban pynsngewthuh paidbah kumno ban ïada na jingpang da kaba leit lynti na Ladthadlaboh, Newhill, Ïawmusiang, DC Office, Stand War bad la pynkut sha duh District Library Mynthong, Jowai.
