Nongpoh, Lber 31: Ha kawei na ka jingjia ïa tyngkhuh kali kaba la jia mynta ka sngi u Blei, ar ngut ki samla ki la duh noh ïa la ka jingim, kaba dei hadien ba ki la leit tynrah ïa kawei ka kali Eon bad leit tynrah pat sa ïa Shaka jong kawei ka Trok.
Kitei ki ar ngut ki samla bad kiba la duh noh ïa ka jingim ki kynthup ïa u Khrawbor Pakma bad u David Sajem kiba dei na West Jaintia Hills.
Katkum ka jingtip ba la ioh lum na ki bor Pulit, la ong ba kane ka jingjia ka la jia ha ka por 3.30 eiei janmiet ha ka surok Shillong By-pass kaba don hajan Tyndai Resort.
La ong ruh ba ki pulit kiba la ioh jingtip ïa kane ka jingjia, ki la hiar mardor sha katei ka jaka bad haba poi ha katei ka jaka la lap ba kawei ka Scooty kaba don ïa u number ML05 AB 5721, ba la ñiah da u Khrawbor Pakma na ka shnong Mynso, West Jaintia Hills, bad uba shong nadien u David Sajem, na ka shnong Ioksi, West Jaintia Hills, ki la ngat ha katei ka apot ïa tyngkhuh kali katba ki dang thmu ban kiew sha Umiam ban pyrshang buddien ïa kawei ka kali.
Ka tyllong khubor na ki Pulit ka ong ruh, ba kane ka jngjia ka la jia ka dei namar ba katei ka Scooty ba la shong da kitei ki ar ngut ki thmu ban knieh ban ïaid shakhmat ïa kawei ka kali Hyundai Eon kaba don ïa u number ML 05 K 2600, ba la ñiah da u Bah B. Marbiangbor Thangkiew, na Nongkseh, Upper Shillong bad ha ka jingpynher ïa ka Scooty ki la leit ban tynrah kylla ïa kane ka kali kaba la long ka daw ka jingjia jong kane ka jingjia ba sngewsih.
Ki Pulit ki ïathuh ruh ba hadien katei ka Scooty ka la leit ban tynrah ïa katei ka Kali Hyundai Eon ka la leit ruh ban tynrah ïa ka shaka jong kawei ka trok kaba don ïa u Number ML 11 8622,ba la ñiah da u Iohbor Lapasam na ka shnong Shangpung, East Jaintia Hills, ba kine ki ar ngut ki la shah iuh syndon na ki bynta jong ka khlieh haduh ba ki la duh syndon ïa la ka jingim.
Shuh shuh, la ong ruh hadien ba la pynlong ïa ka jingtohkit ki bor pulit ki la rah noh ïa ka met jong kitei ki ar ngut sha Civil Hospital Nongpoh ban pyndep ïa ka Post mortem examination bad ruh ban leh katkum ki kyndon jong ka aiñ.
