Suba ba pynïap hi u lok ïa la ka kurim, mynsaw ïalade watla thmu ban dkhat ïa ka jingim lajong

Nongpoh, Jylliew 27: Ha kawei na ka jingjia kaba la pynpar niangkhriat ïa kiba bun balang, kawei ka longkmie ka la duh ïa la ka jingim ha kaba la suba ba ka la shah pynïap ha la u kurim bad u kurim ruh u la pyrshang ban pynkut ïa la ka jingim halor ka jingkynnoh ba u la pynïap hi ïa ka lok. Mynta une u kurim u don hapdeng ka jingmynsaw jur.
Ka ka la jia ha ka janmiet Lah Sngi U Blei ha ka shnong Kyrdemkulai, 5Kilo, Ri Bhoi District.
Ia kane ka jingjia la pyntip da ki paidbah sha ki bor Pulit ha kaba ki la lap ba ka longkmie ka la khladnoh hashen katba u kurim jong ka u don hapdeng ka jingmynsaw kaba jur hapdeng ka jinglyngkien jong ka snam ha ka ïingsah jong ki.
U Superintendent of Police ka Ri Bhoi District u Giri Prasad u la iathuh, hadien ba la ioh jingtip halor kane ka jingjia la phah mardor ïa ki bor Pulit ryngkat ki Doctor ban leit tohkit halor kane ka jingjia bad hadien ba la pynlong ïa ka jingtohkit la lap ba baroh ar ngut ki la thiah lyngktar ha madan jong ka ïing hapdeng ka jinglyngkien da ka snam suda. Hadien ka jingtohkti ki Doctor ki la pynthikna ba ka longkmie ka la khladnoh katba u kurim jong ka u la shu mynsaw jur.
Ki Pulit ki la rah noh mardor ïa ka met jong u rangbah sha Umsning CHC ban ioh ïa ka jingsumar bad namarba la jur ka jingmynsaw la pynkynriah noh sha Civil Hospital, Shillong ban ioh ïa ka jingsumar kaba kham bha.
U Prasad u la ïathuh ruh halor kane ka jingjia ym pat lah ban ai ïa ka daw kaba thikna hynrei la suba ba ka longkmie ka la shah pynïap hi ha la u jong u kurim bad na ka jaka ba la ka la shah pyniap la lap ruh ïa ki tiar pynmynsaw ba u kurim u la pyndonkam ban dkhat jubor ïa la ka jong ka kurim.
Halor kane ka jingjia, ka para jong ka longkmie ba la khladnoh ka la mudui da ka ejehar ha Nongpoh Police Station bad ki Pulit ki la register case pyrshah ïa u kurim jong ka longkmie ba la khladnoh bad ia mynta ki Pulit kim pat lah ban tohkit namarba u dang don hapdeng ka jingshah sumar na ka jingmynsaw, la iathuh u Prasad.