Shillong, Jylliew 27: Ki Garo ba la shong la sah sha bar jylla naduh mynta ka kynti kin ym lah shuh ban ïoh jingmyntoi na ka bhah kam ba la mang ïa ki Garo kat kum ka Reservation Policy jong ka jylla bad kane ka dei hadien ba ka kynhun Myntri ka la rai ban pynkylla ïa ka Office Memerandum (OM) jong u snem 1972.
Haba kren sha ki lad pathai khubor ka Myntri ka sorkar jylla bad kaba dei ruh ka nongai ktien jong ka ka la ïathuh ba ha ka jingïalang ka Kynhun Myntri la rai ban weng noh ïa ka kyndon jong ka Reservation Policy kaba ai lad ïa ki Garo kiba ym dei na ka jylla ban ïoh kam na ka bhah ba la mang ïa ki paid Garo kat kum ka bhah ba la ai na ka Reservation Policy.
“Ka OM dated 1974, ngi la weng noh namar kumba long mynta ki bun ki Garo kiba wad kam ki la biang ka kyrdan bad ki long ruh kiba biang ban pyndap ïa ki kam ba la mang na ka bynta jong ki bad na kata ka daw kato ka bynta ba ai lad ïa ki Garo kiba na bar jylla ban ïoh kam na ka bhah ki Garo ngi la pyndam noh,” ka la ïathuh.
Lah ban kdew ba ha ka por ba u President ka VPP u Bah Ardent u pynbna ïa ka jingïakhih shong shah thngan hadien ba ka sorkar jylla ka kyntait ban ai lad ïa ka party ban ïatai ïa ka Reservation Policy u Bah Ardent u la kdew ruh ka jingdawa ka VPP ban pynkylla ïa ka Reservation Policy ka dei ban pynïohnong ïa ki Garo kiba dei ki nongshong shnong ka jylla namar ba ïa ka bhah jong ki ha ka Reservation Policy la ïoh bam jem da ki Garo bym dei satia tang ki nongshong shnong ka jylla.
Ka la ïathuh ba ka Kynhun Myntri ka la pynkylla ruh ïa ki OM jong ka Reservation Policy kaba la pynmih da ka sorkar jylla ha ki snem kiba la leit.
“Ha kane ka kynti ba mynta namar ki don ki OM kiba thymmai na bynta ka jingpyntreikam ïa ka Roster ngi la weng noh ïa ki katto katne ki bynta jong ka OM ba la pynmih ha ki snem kiba kham mynshuwa,” ka la ong.
“Kum ka nuksa ka OM ba la pynmih ha ka 12 Kyllalyngkot 1972 ha kaba ïadei bad ka kam ba thylli ba la mang na bynta ki Scheduled Tribes bad Scheduled Castes ha kaba ka jinglait kam ka long tang 9 ne duna ïa kata ka bhah ba la kdew ba yn bhah na bynta ki ST ne SC kane ka kyndon ka ïap noh namar la wanrah da ka OM kaba thymmai,” ka la bynrap.
Shuh shuh ka la ong ba Om kab ïadei bad ka bhah na bynta kiba don jingduna ha ki dkhot met ïa kaba la pynmih ha u 2020 la pyndam noh namae ka la mih ka OM kaba thymmai ha ka 14 tarik Jylliew ban treikam salonsar.
Ka la ïathuh ruh ba ha kane ka OM kaba mynta na bynta ka Roster la bush ïa ka bynta kaba kdew ba ki nongwad kam ki dei ban nang ruh ban kren ïa ka ktien tynrai ka jylla na bynta ki kam baher bapher.
“Ka kyndon kaba thymmai ha ka para ba 2 ngi la bsuh ba ki samla ba thep kam ïa kaba ka eksamin la pynlong da ka DSC ki donkam ruh ban nang ban kren ïa ka ktien ba kren ha kata ka district,” u la ong.
