Shillong, Naiwieng 01: Ka jingïakhun semi final jong ka lympung SSA 4th DIVISION Football League 2023 kaba la long hynne ka sngi Hat Majai ka la jam sha kaba kut ha kaba ka Iatyllilang SC ka la kylla long ka kynhun ba ar hadien ka Kharang SC ban jam sha ka final mynta ka samoi.
Kane ka jingïakhun kaba la sdang ha ka por 2 baje nohphaisngi ha madan 1st Ground SSA Stadium hapdeng ka Iatyllilang SC pyrshah ïa ka Mawkriah West SC. Haba bishar ïa ka jingïakhun ka la long kaba itynnat bad kaba ïakhaid, ka kylla step ka la kut khlem don nongthep.
Baroh ar kynhun ki la ïa pyrshang katba lah ban pynkhihjar hynrei ym shym la don ba lah ban pynïakhlad bad kane ka la bteng shi slem dei tad ynda la jam sha ka 85 minit ba u Melawantei Kharmuti u la ïoh ban thep ïa ka shi kol na bynta ka Iatyllilang SC.
Lyngba kane ka namjop, ka Iatyllilang SC ka la ïoh ban rung sha ka final jong ka SSA 4th DIVISION Football League 2023 bad kan sa aireng pyrshah ïa ka Kharang SC ban ïaknieh namlahduh ha ka 04 tarik Naiwieng.
Mynta ka sngi yn bteng biang ïa ka jingïalehkai SSA 2nd DIVISION Football League 2023 ha madan 1st Ground SSA Stadium, ka jingïakhun kaba nyngkong kan sdang ha ka por 11:30 mynsngi hapdeng ka Nongrah SC pyrshah ïa ka Pohkseh SC, nangta bud sa ka jingïalehkai ha ka por 2 baje nohphaisngi hapdeng ka Lumshyiap SC pyrshah ïa ka Imson SC.
