Donkam ïa ka jinglong kawei ki samla ban khanglad ïa kiba nabar: Bah Jiedstarlan

Nongstoiñ, Naiwieng 02: Ka Kyntiewshaphrang Sports & Cuktural Club Mawsikar ha ka sngi nyngkong jong ka taiew, ka la plie pyrda ïa ka lympung phutbol ha madan Mawsikar. Ha kane ka lympung jong u snem 2026-27, ki la don kumba 56 tylli ki kynhun bapher bapher kiba la wan ban ïashimbynta.
Ha ka sngi plie ïa kane ka lympung, la don ryngkat ruh da u Jistarland Lyngkhoi President FKJGP Rambrai Circle & Assistant Secretary FKJGP West Khasi Hills District, kum u kongsan.
Haba ai jingkren ha ka sngi sdang na ka liang u kongsan u la ai jingmut ïa ki samla ka dong ka thaiñ Mawsikar Langpih Area, ban don ka jingïaieit bad ka jingïatylli kum shipara, khnang ba ki briew kiba nabar kin ym lah ban shim kabu ban pynpait pynpara ïa ka jingïatylli para doh para snam bad para nongshong shnong.
U la pynkynmaw ruh ba ka jingïalehkai football ka dei ka dawai ban pynkoit ïa ki khun samla ban lait na ki jingmlien kiba sniew, kum ka kyiad u drok bad kiwei kiwei. Ka jingïalehkai football ka ai ruh ïa ka mynsiem ban pynkmen ïa ki paitbah nongpeitkai, khamtam ban ïa ithuh ithaw bad ban wanrah ïa ka jingïatylli.
Na ka liang u kongsan u Kongsan u la kyntu ïa baroh ki 56 tylli ki kynhun ba kin kynmaw ba kin ïalong kawei ka jingmut. Hooid, ha ka jingïalehkai don ba jop don kaba rem, hynrei dei ban ïai trei shitom ban nangkiew shaphrang. Kum ka dak ban kyrshan lem ïa ka Kyntiew Shaphrang Sports & Cultural Club Mawsikar, u kongsan u la ïoh ruh ban synñiang da ka song pisa.
Kiwei kiba la donlang ha kane ka sngi ki long u Bah Jyrmansing Nonglang President KSS&CC Mawsikar, nangta la ïoh ban kren pdiang da u Synsharbor Marweiñ uwei na ki nongïalam shnong Mawsikar bad kiwei kiwei de ki riew rangbah, ki samla bad ki longkmie kiba la sakhilang ïa kane ka sngi kaba shongshit.
Ha kane ka sngi sdang ka jingïalehkai football ka la long hapdeng ka Kyrdum SC pyrshah ïa ka Mawsikar SC, ha kaba ka Kyrdum SC ka la pynliem ïa ka Mawsikar SC da ar kol la kawei.