Pynshlur u Bah Oral Syngkli daka lympung phutbol ïa ki riew rangbah ban sumar ïa ka koit ka khiah

Nongpoh, Naiwieng 02: Ka kynhun ïalehkai phutbol jong ka OIG Jong-i ka la long ka lahduh jong ka lympung ïalehkai phutbol 1st Above 40 Years One Day Knock-Out Football Tournament 2026, kaba la pynlong da ka Syngkli Colony FC lyngba ka jingïalam jong u Bah Oral Syngkli, ha madan Western Ri-Bhoi Sports Association, Patharkhmah.
Ha ka jingïakhun phainal, ka OIG Jong-i ka la lah ban pynliem noh ïa ka RBWO da 5-3 kol lyngba ka tie-breaker, hadien ba baroh ar ki kynhun ki la ïakhaid khlem don ba ïoh thep kol ha ka por ba la buh. Kum ka lahduh, ka OIG Jong-i ka la ïoh ban khur ïa ka song pisa kaba T.50,000, katba ka RBWO kum ka nongwan ba ar ka la ïoh T.30,000.
Haba kren halor kane ka lympung, u Bah Oral Syngkli u la pynpaw ba ka jingpynlong ïa kane ka lympung ïalehkai phutbol dei namar ka jingioh mynsiem naka mei-ieid Kmoin Wahlang, kaba la don 78 snem ka rta hynrei kaba dang ïashim bynta ha ki jingïakop mareh marathon ha kylleng ka ri India bad shabar ri, bad kaba la khur ruh ïa bun tylli ki takma.
U la kyntu ïa ki paidbah ba kin shimkhia ïa ka koit ka khiah bad ban pynlong ïa ka jingïalehkai met kum shi bynta jong ka jingim, da kaba pynpaw ba ka koit ka khiah ka donkam ïa ka jingsumar bad ka jinglong adkar khlem da kheiñ ïa ka rta.
Ha kane ka sngi la don ryngkat ruh u Phadar Kynsai Kurbah, Parish Priest jong ka Umkadhor, u Pastor F. Syngkli na Jirang Presbytery bad kiwei ki riew rangbah jong ka thaiñ. Ki la ai jingïaroh ïa u Bah Oral Syngkli halor kane ka sienjam bad kyntu ïa ki paidbah ban don ka mynsiem ban noh synñiang sha ka imlang sahlang da kaba sam ïa ki jingkyrkhu kiba ki ïoh.
Ha kane ka lympung ki la don hynriew tylli ki kynhun kiba la wan ïashim bynta kynthup na Umroi, Umsning, Nongpoh bad kiwei ki bynta jong ka Western Ri-Bhoi.