Jowai, Naiwieng 02: Ka General Meeting jong ki klob ba la ïasoh bad kiba hap hapoh ka West Jaiñtia District Sports Association (WJDSA) kaba la long haka 30 tarik u Risaw, 2026 ha Dorbar Hall jong ka Shnong Tpep Pale, Jowai, kala shim ïa ka rai ban pynsangeh shuwa ïa ki lympung phutbol jong une u snem 2026.
Ka daw ka long namar kiba bun ki player ki la kynriah (transfer) sha kiwei pat ki Association bad kumta la shem jingeh ban ïoh player ha kane ka kynti namar sa ka por ka la dier palat ban pynlong ïa ki lympung.
Nangta kaba ar pat, ka long ba bun ki nongïalehkai jong ki Club ki dei ki khynnah skul bad kan buh jingeh ïa ki ban pynleit jingmut ïa ka phutbol bad ha kajuh ka por ban pynkhreh ruh na ka bynta ka eksamin skul ha kine ki bnai tlang.
Ka synjuk ka la pyntip ruh ba na ka bynta u snem 2027, la rai ba yn shna ïa ka calendar year jong baroh ki jingïalehkai ha baroh ki Discipline kiba hap hapoh ka jingpynïaid ka Association.
Shuh shuh ka Association kan pynlong ruh ïa ka AIFF Referee’s Course bad Examination haka taïew ba nyngkong jong u bnai Nohprah katkum bala aibor da ka Meghalaya Football Association (MFA).
Kumta la bthah ïa baroh ki Affiliated Club ba kin phah kumba ar ngut ki candidate na kawei ka club sha kane ka course da kaba ai jingthoh sha u General Secretary WJDSA.
Kane ka long katkum ka kyrwoh na u General Secretary ka West Jaiñtia District Sports Association (WJDSA).
