Shillong, Nailar 04: Ka Umiew Maw U Sam SC ka la ïoh ban jam sha ka wat ïakhun semifinal hadien ba jop da 3-1 kol ïa ka Nongkolew SC ha ka jingïakhun ïa ka quarterfinal kaba ar jong ka lympung U-20 Fourth Division 2024 ba la pynïaid da ka Shillong Sports Association ha SSA Ground, Polo, ha ka Sngi Saitjaiñ.
Katkum ki kyndon jong kane ka lympung, da kaba ïohrung sha ka Semi final ka Umiew Maw U Sam ka la pynthikna ïalade ban ïoh ïakhun ha ka kyrdan Third Division na bynta ka aïom lehkai ban wan.
Related Posts
Haba phai sha ka jingïalehkai, ka Umiew Maw U Sam SC ka la don jingkyrmen hadien ba ka la ïoh lamkhmat da 2 kol ha ka kylla step ba la pynkhih da u Eller C Allya ha ka 42 minit, nangta na u Eric Nongrum ha ka 45 minit.
Ka kol kaba lai kaba la pynthikna ïa ka kynhun ban khur ïa ka jingjop ka la urlong ha ka minit ba 55 ba la thep da u Emanuel Rongrin. Ka Nongkolew SC ka la ïohlad ban pynphai shi kol lyngba u Donkupar Mynsong ha ka 77 minit hynrei ka por ka la lyngkot eh ïa ka kynhun bad ka la shah rem noh.