Syed Mushtaq Ali Trophy 2026-27: Mad ka Meghalaya ïa ka nam rem da 7 wiket ha ka Services

0

Shillong, Naiwieng 16: Ka Services ka la pynliem noh ïa ka Meghalaya da 7 wiket bad pynsah sa 2.2 ober ha ka jingïalehkai plate group kaba ar ha ka Syed Mushtaq Ali Trophy 2026-27 hynne ka sngi Nyngkong ha Sovima, Nagaland.
Haba tied nyngkong hadien ba jop ïa ka jingkynting pisa (toss), ka Meghalaya ka la lah ba kan kamai 151 ron bad hap 8 wiket haduh kaba kut jong ki 20 ober hynrei ka Services ka la pyndep ban kynjoh ïa ka thong tang haki 17.4 ober khlem kano kano ka jingeh.
Shuwa kane ka jingïakhun, ka Meghalaya ka la pynliem ïa ka Nagaland ha ka jingïalehkai kaba nyngkong ha ka sngi Saitjaiñ, katba ka Services ka la jop ïa ka jingïalehkai ba sdang pyrshah ïa ka Sikkim.
Hadien ba ka la duh ïa u nongtied ba nyngkong khlem kano kano ka jingmyntoi, ka Meghalaya ka la shañiah tylli ha u Jiwanjot Singh (54 ron naki 48 bol, 7x4s) bad u Josiah Momin (21 ron naki 12 bol, 4x4s) ban kyntiew ïa ka ron. Hynrei ki nongtied ki la ïai bteng ban khyllem kaba buh ïa ka Meghalaya ha ka jingeh kaba khraw, da kaba kamai 115 ron bad duh 8 wiket ha ka 16.5 ober hadien ka jingshah weng noh u Jiwanjot.
Hynrei ka jingshan skhem jong u Swarajeet Das (19 ron naki 11 bol, 1×4, 1×6) bad u Akash Choudhary (16 ron naki 10, 1×4, 1×6), kiba la ïaineh haduh kaba kut ka la ïarap ïa ka Meghalaya ba kan bynrap sa 36 ron haki 3.1 ober ba khatduh.
Ha ka pali bol u Chengkam Sangma u la khur 2/16 haki 3 ober hynrei ha kiba bun ki khep ka Services ka la muja ïa ka pali tied jong ka, da kaba khyrwit jem ïa ki bol jong u Akash (1/48 haki 3 ober), u Swarajeet (0/27 haki 3 ober) bad u Amiangshu Sen (0/14 haki 1) ban kamai ron.
Ka Meghalaya kan ïakhun pyrshah ïa ka Manipur ha ka jingïalehkai kaba lai ha kane ka sngi Balang ha ka por 12:30 baje mynsngi.

Leave A Reply

Your email address will not be published.