Shillong, Nailar 04: Ka kynhun ïalehkai phutbol ki thei ka Jylla Meghalaya ka la sdang ïa ka lynti jong ki ha ka lympung ‘Junior Girls’ National Football Championship’ (Tier 2) kaba la long ha Belgaum, Karnataka, da ka namrem da 2-1 kol ha ka Sikkim, hynne ka Sngi Saitjaiñ.
Katkum ka prokram, ka kynhun Meghalaya ka la dei ban aireng pyrshah ïa ka Sports Authority of India ar sngi mynshwa hynrei ka SAI ka la weng noh ïalade na kane ka lympung, kaba pynsah satang lai tylli ki kynhun ha ka Group D, kawei pat ka kynhun ka long ka Madhya Pradesh.
Tang ki kynhun kiba poi kyrdan ba hakhlieh duh ka Group ki ban ïohrung sha ka semifinal, kane kamut ba ka Meghalaya ka la khyllem lypa naba ka Sikkim ka la jop ar sien lynter ki jingïakhun, ïa ka Madhya Pradesh ka la pynliem da 3-2 kol ha ka Sngi Palei bad mynta ka la khur pura 6 point.
Haba phai sha ka jingïakhun hynne ka Sngi, ka Meghalaya ka la ïoh ban lamkhmat nyngkong ha ka minit ba 20 lyngba ka Eiladki Ksoo hynrei ka Sikkim ka la wanphai da kaba tyngeh ha ka kylla miet bad ka la shem ïa ka kol ban pynïakhaid na ka Smeeta Sundas (59′ minit) shuwa ban thep ïa ka kol pynjop ha ka 90 minit lyngba ka Yangreep Lepcha.
Ka Meghalaya kan aireng sa ïa ka Madhya Pradesh mynta ka Sngi ha ka jingïakhun kaba khadduh jong ka Group.
Ki thei ïalehkai kiba la mih madan ïa ka Meghalaya ha kane ka jingïakhun ki long: Shishameri L Peinlang (GK), Saphapaia Lyngdoh, Ibadarihun Nongsiej, Blessiful Thongni, Larihun Songthiang ( sub ha ka 75′ minit), Alisha Lyngdoh, Bonifilia Shullai, Balabet Khongsit, Philasakhi Marngar, Eightfulness Shangdiar, Dakani Shylla (sub ha ka 75′ minit), Eiladki Ksoo, Adelecia N Khongwar, Judith Kharmuti (sub ha ka 66′ minit).
