Shillong, Nailar 04: U Bah PT Sawkmie, MLA barim u la pynpaw ba ki Sport Club kiba don ha Mawlai ki la shem jingeh bha ha kine ki sngi kiba mynta, naba kim ioh hok ïa ki jingïarap haba ki donkam ïa ka.
U bah Sawkmie u la pynpaw ïa kane hashuwa ban aiti ïa ka song jingïarap pisa lyngba ka song pisa sha ka Mawtawar Sports Club ha ka prokram kaba ki la pynlong hapoh iing shnong jong ka Mawtawar ha ka sngi Saitjain ka 03 tarik u Nailar, 2024.
Ym tang ïa ka Mawtawar SC, hynrei mynha ka sngi Balang, ka 01 tarik u Nailar, u bah Sawkmie u la aiti ruh ïa ka song jingïarap pisa sha ka Umrynjah SC bad ka Nongkohlew SC. U la aiti ïa kane ka song pisa ha u president ka Mawtawar SC u bah Peter Mukhim, ha ka jingdon ryngkat u rangbah shnong bah Cornelius Kharkongor, ki rangbah dong, ki nongkitkam ka Mawtawar SC, ki player bad kiwei kiwei.
Ka Mawtawar SC kan sa mih madan ha ka lympung ïalehkai 1st Division jong ka Shillong Sports Association kaban sa long shen mynta u snem, katba ka Umrynjah SC ka la ïoh rung sha ka Semifinal jong ka 4th Division bad ka Nongkohlew ka la rem noh ïa ka jingïakhun ïa ka Quarterfinal ha kane ka juh ka kyrdan ïakhun ha ka sngi Saitjain.
Haba kren ha ka jingïalang balyngkot ha ïing shnong ka Mawtawar u bah PT Sawkmie u la pynpaw ïa ka jingsngewkhïa kaba jur bha haba u peit ïa ka jinglong jingman ki Sports Club hapoh Mawlai.
U la ong ïa ki paidbah nong Mawlai ba kin hap ban ïa buh ïa u dak jingkylli uba heh bha, kaei kaba pynlong ïa u ba un mih shakhmat ban ïarap ïa ki sports club, watla um long eiei shuh, uta u MLA ne u MDC.“Hooid kum u MLA barim u ieit ban shakri paidbah bad um lah ban shu peit khlem da leheiei, khamtam haba ki ud ki nam sha u.
U pynpaw ruh, ba ha ka por long MLA ma u, ha ki 20 snem ba la leit ym ju don ba pynlong fete ki Sports Club, hynrei mynta la iohi ïa ka Mawtawar SC ba ka hap ban pynlong fete na ka bynta ban mih pisa na ka bynta ka Club.
Haba pynpaw ïa ka jingsngewnguh u bah Peter Mukhim, u la pynpaw ba ha ka por long MLA bah PT Sawkmie, ki ioh kylluid bha ka jingïarap pisa, kaba long shi lak tyngka, kaba ki ioh ban pyndonkam katkum ka jingkwah jongki.
Na ka lïang u Secretary ka Umrynjah SC u bah Reading Kharshiing ruh u la ai khublei ïa bah PT Sawkmie halor ka jingai jingïarap jong u bad u la pynpaw ïa ka jingsngewburom halor kane ka jingkyrshan jong u ïa ka Sports Club jong ki.
