ASSA: Jop ka Pasadwar bad Syndai Lyngkot haka 2nd Division, ka Amlanai YB bad Iaikyntiew Pamtbuh haka 1st Division

0

Amlarem, Naiwieng 16: Saw tylli ki kynhun ba kynthup ïa ka Pasadwar bad ka Syndai Lyngkot, nangta ka Amlanai YB bad ka Iaikyntiew Pamtbuh ki la jop ïa la ki jong ki jingïalehkai ha ka lympung Second bad First Division hynne ka sngi Nyngkong (16 tarik u Naiwieng, 2026).
Baroh ar tylli ki lympung la pynlong da ka Amlarem Sub-Divisional Sports Association (ASSA) ha madan ASSA Mini Stadium, Ladjaplem.
Ha ka Second Division, ka jingïakhun ba nyngkong la sakhi ïa ka Pasadwar kaba la pynliem noh da 1-0 kol ïaka Sankhat SC. U Becareful Amsynsong u la thep ïa ka kol kaba kongsan haka minit ba 40 na ka bynta ka Pasadwar.
Nangta ka jingïakhun kaba ar ha kajuh ka kyrdan, ka Syndai Lyngkot kala pynjemkhnap da 4-0 kol ïaka Amtra CSSC. U Iohi Chyrmang (2 & 49’) bad u Pynyoladmi Papang (14 & 54’) ki la pynkhihjar mar ar sien ban pynskhem ïa ka jingjop na ka bynta ka Syndai Lyngkot.
Haba phai pat sha ki jingïakhun jong ka First Division, kaba nyngkong la sakhi ïa ka kynhun ïalehkai jong ka Amlanai YB kaba la jop da 2-0 kol pyrshah ïaka TSC Moosakhia. Ki ar kol jong ka Amlanai YB la thep da u Founder Son Manar (45’) bad u Pyrkhat Khongïong (80+1’).
Nangta haka jingïalehkai kaba bud, ka Iaikyntiew Pamtbuh kala pynliem noh da tang 1-0 kol ïaka Amkoi SC, bad ïa kane ka kol kaba kongsan la thep da u Wankaiemuh Surong haka minit ba 20.

Leave A Reply

Your email address will not be published.