Shillong, Nailar 04: Ka Lumparing SC ka la sdang ïa ka lynti ïaid jong ka ha ka lympung Third Division 2024 ba la pynïaid da ka Shillong Sports Association Da ka namjop. Ka Lumparing ka la pynjemkhnap haduh 5-0 kol ïa ka Krang SC ha ka jingïalehkai kaba la long ha SSA Ground, Polo, ha ka Sngi Saitjaiñ.
Ha kane ka jingïakhun, ka Lumparing ka la ïoh ban lamkhmat lypa da 2 kol ha ka kylla step lyngba u Sholinstar Syngkli (18′ minit) u ba la pynkhihjar nyngkong, bud sa ka kol kaba ar na u Riskhem Syiem (45’+1 minit) shuwa ban jam sha kaba kut ka kylla ba nyngkong.
Related Posts
Hadien katto katne por ba la ïaid ka kylla miet, u Sholinstar (72′ minit) u la ïoh ban thep sa ïa ka kol kaba ar jong u bad kaba lai na bynta ka kynhun. Ka jingïalehkai kam shym la kut hangne, naba ka Lumparing ka la ïai bteng ban ñion bad ïoh thep sa ar kol kiba la wan lyngba u Gilbert Nongneng (85, 87 minit) ban pynthikna ïa ka namjop bad ki lai point ba pura.
Ka jingïakhun kaba bud kan long ha ka 6 tarik u Nailar, hapdeng ka Mawkriah West SC bad ka Umpling SC ha ka por 1 baje mynsngi, na ka Group C ha SSA Ground, Polo.