SSA 2nd DIVISION: Jemkhnap ka Laitlyngkot SC ha ka Mawtawar SC, jop ka Sohryngkham SC
Khyrwit hat trick u Steward Ryntong.
Shillong, Naiwieng 23: Ar tylli ki kynhun kiba kynthup ïa ka Mawtawar SC bad ka Sohryngkham SC ki la khur namjop hynne ka Sngi Palei ha ka kyrdan ïakhun jong ka SSA 2nd DIVISION Football League 2023 ba la long ha madan SSA Ground.
Haba phai sha ka jingïakhun kaba nyngkong ha ka por 11:30 baje mynstep, ka Mawtawar SC ka la pynjemkhnap ïa ka Laitlyngkot SC da kaba pynbam haduh 5 kol.
Ka namtam ha kane ka jingïakhun ka leit sha u Steward Ryntong u ba la khyrwit lai kol (hat trick) ha ka minit ba 9, 34 bad 87. Nanta ki ar kol pat na u Larrykardson Lyngdoh ha ka minit ba 65 bad u Teibhalang Kharpuri ha ka 80 minit.
Ha ka jingïakhun kaba por 2:30 baje nohphaisngi, ka Jongksha SC ka la shah rem noh da 1-2 kol ha ka Sohryngkham SC.
Ha kane ka jingïakhun dei ka Jongksha SC kaba la ïoh thep nyngkong lyngba ka kol na u Nangiarkam kshiar ha ka 22 minit bad lamkhmat ruh ïa ka jingïakhun ha ka kylla step.
Hynrei ka Sohryngkham SC kam shym la kynrandien bad dei ynda la jam sha ka 76 minit ba u Wanbok Dkhar u la ïoh ban pynïakhaid shuwa ba u Wanlambha Kharpran un thep ïa ka kol kaba ar ha ka 82 minit ban pynthikna namjop sha ka kynhun.