Shillong, Naiwieng 23: Ka long ka jingsngewsarong bad ka burom ïa ka jylla hi baroh kawei hadien ba 10 ngut ki nongïakop ñiah saikil na Meghalaya kiba la ïashimbynta ha ka 6th National Level MTB Tawang Cycling Competition ki la ïoh ban khur takma.
Kane ka lympung ïakop ba la tip da ka National Level MTB Tawang Cycling Competition la pynlong da ka Arunachal Cycling Association ha ryngkat ka jingïatreilang bad ka Cycling Federation of India naduh ka 18 tarik haduh 19 tarik Naiwieng, 2023.
Ka kynhun jong ki 10 ngut ki rang bad thei ïakop ñiah saikil napoh Meghalaya ki la leit ïashimbynta sha katei ka lympung bad ki la wanrah nam ïa ka jylla da kaba khur 10 tylli ki takma ha ki kyrdan ïakop bapher bapher.
ïa kane ka jingïakop ñiah saikil la pynlong ha ki jaka lum jong ka jylla Arunachal Pradesh bad la sakhi ïa ka jingwanshimbynta ki nongïalehkai na kylleng ka ri kynthup ruh kiba na Nepal.
Kane ka dei ka sien kaba nyngkong ïa kane ka synjuk Cycling Association jong ka jylla ban mad ïa ka jingseisoh ha kane ka jait jingïalehkai (sport of cycling) kaba ka jylla ka dang ïaleh ban kyntiew.
Shuwa kane, na ka liang jong ka Meghalaya Cycling Association ka la pynlong ruh ïa ka prokram ai jinghikai bad pyntbit ïa ki nongïashimbynta ki ban mihkhmat ïa ka jylla kumba katto katne taïew shuwa ban sdang katei ka lympung kaba la sei ruh ïa u soh ka jingjop.
Ha ka thup ïakop jong ka Women open XCO Mass Start, ka Phyrnai Kyndait ka la ïoh khur takma ksiar katba ka Lawankordor Swer ka la jop takma rnong. Ha ka Men Junior XCO Mass start, u samla Lambormi Phawa u la wan kyrdan ba lai bad khur ïa ka takma rnong. Katba ki shijur ba kynthup ïa u Lambormi Phawa bad u Dalenmi Sana ki la jop takma rupa ha ka Men Junior XCO relay. Ha ka Men Elite -XCO Relay , u Kevinjohn Khyllait ryngkat bad u Alvindarison Wanniang ki la khur takma rnong.
Nalor kine ki don sa lai ngut ki nongïakop ñiah saikil ka jylla kiba la ïoh consolation prize bad kine ki kynthup ha ka Men Elite – XCO Mass Start ha kaba u Maxius Wanniang u la wan ha ka kyrdan ba saw katba u Middlestar N Marak u la wan kyrdan ba san. Ha ka Men Junior – XCO Mass Start, u Dalenmi Sana u la wan kyrdan ba saw.
