La ju tip naduh hyndai hynthai bad haduh kine ki phew snem ba la dep ba ka Ïewduh hi kadei ka pliang ja jong ka Bri u Hynñïewtrep, hynrei sngewsih pat ban ïohi mynta ba katei ka pliangja jong u paid ka Jylla mynta lada ym tuklar noh lah ban shah knieh jubor noh ha ki bar jylla kiba wan na kylleng ki bynta jong ka Ri. Lah ban ong ruh ba dang tang ha ki khyndiat snem mynshwa ïa ka Ïewduh ki kheiñ kor bha bad ki ju ñïew ïa ka kum ka ‘Pliangja jong ka Bri u Hynnïewtrep’, kata namar kadei ka jaka ba ki paidbah nongshong shnong jong ka Rilum Khasi- Jaintia ha katei ka por ki shaniah beit ha ka Ïewduh ban wan die ïa ki mar rep ne mar khaïi jong ki bad ha kajuh ka por pat ban thied ïa ki marbam mardih bad kiwei ki jingdonkam ha iing kiba man la ka sngi.
Lada ïa nujor ïa ka Ïewduh bad kaei kaba ka long mynta i pangmet ba ka dur ka dar jong ka ka la nangjah bad i kumba ka la kylla pynban tang kum kawei na ki jaka kamai spah jongno re jongno. Ha ki por ba mynshwa ki rïewtymmen ki ju ïathuh khana ba ym ju shah ïano ïano ruh ban sah ha ïew, phewse mynta katei kajuh ka jaka i kumba ka la jan long pynban ka jaka riehtngen ym ïa u trai ri trai muluk hynrei ïa u khyllahjait, kumba ju mih ka jingkynthoh na ka por sha ka por.
Baroh ki tip ba ïa ka Ïew hi watla kadei kaba peit bad pynïaid da ka Hima Mylliem hynrei ka shong pat ha ka Khasi Hills Autonomous District Council ban tuklar. Kumba ka long haduh mynta hi imat ka rukom pynïaid ïa ka Ïew ha kiba bun ki liang ka la kham sting shisha. Kawei pat ka phang ba ka District Council ka don, ka long ba kadei ban bthah ïa ki bor pynïaid ïew ba ki dukan ki dei ban long kiba khuid khamtam lei lei lada phai sha ki basa marbam kum ki basa doh, basa jhur bad kiwei kiwei.
Lada jia ryngkhat ba ki brïew kiba nabar ri kin ïohi ïa ka rukom die ïa ka doh bad ki marbam ba die ha Ïewduh lehse kin ïathuh khana pateng la pateng namar ïa ka doh kaba ngi bam ngi buh ha ka jaka ba boi da ki skaiñ ba wan na kylleng katba ïa ki juti pat kiba hap ban ïuh bad niom naphang ïa ki jaboh jabain la set ïa ki ha ki duli ïit. Lada peit lei lei ïa ki dukan ba shong da kiwei pat ki jaidbynrïew, wat ïa ka lynti ïaid kjat ruh ki la pynlong kum ka jaka buh tiar ne jaka buh ïa ki tum ki tam ba harukom kaba la poi haduh u pud ba ki paidbah kim don jaka shuh ban ïaid ruh. Ïa kane ym donkam shuh ban sakhi da mano mano ruh hynrei wat kito kiba dei peit ïa ka Ïew ki la ïohi man la ka sngi ha kaba ma ki hi ki la hap ban ïaid pynrit lang haba ki ïaid ha Ïew.
Kawei pat kaba ka Council ka hap leh noh mardor hi kadei ban ym ailad ba ki nongdie jingdie kin shong ha ki jaka ba pynwit ïa ka leit ka wan namar haba khapngïah ka jaka ka pynlong ïa ki nongkloh pla ban shim kabu bad lute katba ïoh da kaba pajut naphang la ka long ïa ka pla kit tïar ne ka pla pisa ruh. Dei ruh ban peit ba ki jaka ïaid ka um kim dei ban shah set lynti namar kane kan pynlong ïa ki um jaboh jabain na kylleng ban poi lut sha ki basa bad ki dukan.
Kaei kaba u paidbah u angnud ka long ba kane ka Executive Committee ba ïalam da u Bah Pynïaid Sing Syiem ka long la ki nud neem ban tuklar halor ka jingjur ki brïew kiba nabar ban khaii pateng ne die jingdie khlem da pynbiang shwa ki kot ki sla kiba long katkum ki kyndon jong ka aiñ Trading by Non- Tribal.
Ym lah ruh ban tip haduh katno ka jingleit hiar jong u Chief Executive Member ka KHADC sha Iewduh ryngkat bad ki Executive Member kan iarap ia ka jingkhuid lane ia ka jingsyier ki nongleit die jingdie bad ki nongthied jingthied. Ka jingud jingnam ki nongshong ïew halor ka jingbun ki nongkloh pla kam dei shuh kaba dang thymmai hynrei kadei kaba la jia bad ka dang iai jia haduh mynta mynne. Ia kane ka bynta la dep ruh ban kren da u CEM ha ka jingleit jurip ia ka iew ha ki katto katne bnai mynshwa hynrei kiei ki sienjam lane hato kita ki kor syntiat ne CCTV ki la don neem kynthup ruh ia ki street light ha kito ki jaka. Khlem pep lada don ki cctv camera kan pynduna ia ka jingdon ki nongtuh nonglute ha ki jaka paidbah bad kan pynsuk ruh ban pynap shrip bad kthong ia ki namar la suk ban buddien shaei ki her.
