Shillong, Naiwieng 23: Ka kynhun ki thei ïalehkai kriket ka Meghalaya ka la ïoh ban khur ïa ka namjop kaba nyngkong na bynta ka jylla ha ka lympung ïalehkai BCCI domestic cricket mynta ka samoi da kaba pynliem ïa ka Nagaland da 7 wicket ha ka Women’s U-15 One Day Trophy kaba la long ha Kolkata ha ka jingïakhun kaba la long hynnin ka Sngi Hat Majai.
Hadien ba shah phah tied nyngkong naba rem ha ka toss, ka kynhun ki thei ka Nagaland ki la shah khanglad noh da tang 74 ron bad hap 7 wicket naki 35 over. Ka Meghalaya ka la pyndep ban kynjoh sha katei ka ron ba la buh tang hapoh 15.1 over bad pynsah sa 7 wicket ha kti.
Ka Diya Biswa ka dei ka thei kawangbol kaba la seisoh bha na bynta ka Meghalaya ha kane ka jingïakhun, da kaba khur 3/14 naki 7 over, katba ka Jennyfer Fancon ka la khur 2/8 naki 7 bad ka Dejianna M Sangma ka la ïoh khur 2/11 naki 7 over.
Haba beh ïa katei ka ron, ka Anastesia Shullai ka la kamai 21 ron khlem da shah pynhap, katba ka Zoya Tasneem ka la ïarap 11 ron.
Haduh mynta, ka Meghalaya ka la pyndep saw tylli ki jingïakhun ha kane ka tournament, shahrem lai sien, kiba kynthup bad ka namrem ha ka Delhi dang hynne ka Sngi Palei. Ka jingïakhun kaba san kan long pyrshah ïa ka Karnataka la Sngi Saitjaiñ.
