Jowai, Naiwieng 23: Ka jingïalehkai phutbol haka kyrdan Super Division Football Tournament 2023 bala ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai hynne ka sngi ha madan Kiang Nangbah Stadium, Dongmihsngi Jowai.
Haba phai sha ka jingïakhun naka liang ka kynhun ïalehkai jong ka Nangbah Mulang kala lah ban pynliem da 3-1 kol ïa ka Shangpung Lumiawmushai.
Ka Nangbah Mulang ka la ïoh ban lamkhmat nyngkong lyngba ka kol ba la thep da u Woldrick Susngi haka minit ba 48 bud sa ka kol kaba ar na u Albert Lyngdoh haka minit ba 53.
Na ka liang jong ka Shangpung Lumiawmushai ka la pyrshang hi katba lah ban pynphai ïa kitei ki ar kol bad ha ka minit ba 56 ka la ïoh ban pynphai shi kol na u Mewatki Sungoh.
Hynrei hadien katto katne por ka Nangbah Mulang ka la pynshem ïalade ban khur ïa ka namjop hadien ba thep ïa ka kol kaba lai lyngba u Chanhok Siangshai haka minit ba 61 kaba la pynthikna namjop.
La pyntip ba ka jingïakhun haka 27 tarik Naiwieng, 2023 kan long hapdeng ka Khimusniang pyrshah ïaka Mynthong por 1 baje nohphai sngi.
