Mad nam rem ka Meghalaya ha ka sngi ïakhun ba nyngkong jong ka Vijay Hazare Trophy 2023-24 pyrshah ïa ka Vidarbha
Shillong, Naiwieng 23: Ka kynhun ïalehkai kriket jong ka jylla ka la sdang ïa ka lynti ïaid jong ka ha ka Vijay Hazare Trophy 2023-24, kaba dei kawei na ki lympung BCCI domestic one day tournament ïa ki shynrang,ha Jaipur hynne ka Sngi Palei da ka namrem, watla shahrem da 32 ron, ka kynhun ka la ïakhun tyngeh bad wanrah ruh ïa ka jingïalehkai kaba itynnat pyrshah ïa ka Vidarbha.
Ka Meghalaya ka la lah ban khanglad ïa ka Vidarbha kynjoh tang sha ka 243 ron bad pynhap 9 wicket haduh kaba kut jong ka 50 over hadien ba ka kynhun ka la jop ïa ka toss bad jied ban bol nyngkong. Hadien kane, ka Meghalaya ka la ïakhun tyngeh triang, bad ïohlad ban kynjoh tang 211 ron shuwa ban hap baroh ki wicket naki 48.1 over.
Arngut ki rangïalehkai kiba la wanphai biang sha ka kynhun hadien ba duh mih madan ha ka Syed Mushtaq Ali Trophy ki la seisoh bha na kane ka jingïakhun, kiba kynthup ïa u Dippu Ch Sangma, u la khur 4 wicket bad tang 43 ron na ki 10 over ki jong u, katba u Kishan u la khyrwit 57 ron naki 75 bol. Na ka liang jong u Swarajeet Das u la kamai 44 ron naki 46 bol.
Dei lyngba u Kishan bad u Swarajeet kaba la ïarap ïa ka Meghalaya ban don ha ka lynti jingkyrmen ban kynjoh sha katei ka ron ba la buh, da kaba kyntiew 78 ron shuwa ban hap u wicket ba san. Ka la shimpor tang 24.5 over ïa ka Meghalaya ban kamai 77 hynrei u Kishan bad u Swarajeet ki la kamai 78 ryngkatlang tang hapoh 14 over kaba la kyntiew ïa ka ron na bynta ka kynhun.
Hynrei, namar ka jingbankhia ban kynjoh sha katei ka ron ba la buh hapoh ka over ba la buh ka la pynlong ïa ki wicket ka Meghalaya ban hap u wei hadien u wei.
Napdeng ki rangkawangbol, u Akash Kumar Choudhary u la pynkut ïa ka inning da 2/47 naki 10 over, katba u Raj (1/21 naki 4), Anish Charak (1/43 naki 9) bad u Swarajeet (1/48 naki 7) ki la ïoh ban khur mar u wei.
Watla ka kynhun ka mad ïa ka namrem, lah ban kdew ba ka Meghalaya ka la sdang ban sei ïa u soh ha ka rukom lehkai bad ka khmihlynti ban khur ïa ka namjop ha ka jingïakhun kaba ar, ka ban long pyrshah ïa ka Chhattisgarh la sngi Saitjaiñ.