Mawkyrwat, ‘Naiwieng 23: Ka Golden Lion Football Club na Rymbai ka la long ka nongjop hadien ba ka la pynliem noh da 5 – 4 kol pyrshah ïa ka Siliguri United Football Club na West Bengal ha ka lympung ïalehkai kynjatbol ba la tip kum ka XVI Mawlangwir Invitation Football Tournament (MIFT) 2023-24 ha madan Rowell Lyngdoh Stadium, Mawlangwir, South West Khasi Hills District.
Ha ka jingïalehkai ha kane ka sngi, ka la long ka jingïalehkai kaba itynnad bha ha kaba ki ‘rangïalehkai jong baroh ar kynhun ki long para ba ïa biang bor bad kumjuh ka jinglah ruh ban kyrda na ki nongapkol ha kaba kim shym la ai lad ba ka bol kan rung hapoh ka kol.
Haba phai ha ka kyllastep bad ka kyllamiet ruh ka jingïakhun hapdeng ka Golden Lion FC ka Siliguri United FC ki la long para ba ïa khaid bad ba ym shym la don mano mano ruh ba ïoh ban ïa pynrung ïa ka bol hapoh ka kol.
Kumta ka jingïalehkai hapdeng kitei ki ar kynhun ka la shu kut noh da kaba pynïaleh da ka Tie Breaker ha kaba ka Golden Lion Football Club ka pynrung haduh 5 kol katba ka Siliguri United Football Club tang 4 kol.
Hadien ka jingïalehkai, la ïoh ruh ban sam ïa ka khusnam kum u ‘rangïalehkai ba btit ha ka lympung sha u Chephred Lyngdoh jong ka Golden Lion Football Club.
