Ha ka roi ka par kiar ban don ka jingkhim mynsiem namar ïoh ngi duh nong ha kiba bun ki bynta: Ong u bah Pius
Mawkyrwat, Naiwieng 07: Ka Rangthong Cultural Club & Sports Association (RCC&SA) ha ka sngi saitjaiñ jong ka taïew ka 7 tarik u Risaw, 2026 ka pynlong ïa ka jingïalang plie paidbah ïa ka Madan Mawphuior kaba don ha Shnong Rangthong, South West Khasi Hills District ha ka jingmang pisa kaba 23 lak tyngka.
Ha kane ka prokram, u bah Pius Marwein, MLA & MDC ka Ranikor Constituency, u la long kum u Kongsan, u bah Lestar Syiemlieh, Symbud Kongsan ha ryngkat ka jingdonlang u Bah K. Nongrem, Myntri Shnong Rangthong, ki riew rangbah, ki longkmie, ki samla lem bad ki paidbah jong ka shnong Rangthong.
Haba kren ha kane ka sngi kum u Kongsan, u bah Pius Marweiñ, uba long u MLA/MDC jong ka Ranikor Constituency u la ïaroh ïa ka shnong Rangthong kaba la long kum kawei na ki shnong ba long ka nuksa ha kiba bun ki bynta namar ba ki paidbah nongshong shnong ki don mynsiem jong ka jingïatylli na ka bynta ka roi ka par.
Related Posts
Shuh shuh haba kren ha kaba ïa dei bad ka jingpynïoh ki lad jingïarap na ka bynta ka madan, U bah Pius Marweiñ u la ong ba kane madan phutbol ha Shnong Rangthong la shna na ka jingmang pisa na tnad treikam jong ka Sports Department jong ka sorkar Meghalaya ha ka jingmang pisa kaba 23 lak tyngka. “Hooid! ka jingplie ïa kane ka madan mynta ka sngi ka la long da shisha ka jingkyrkhu ïa ka shnong ka thaw khamtam ïa ki samla kiba kwah bad don ka jingthmu ban kilanmet bad ban pynkyntiew ïa ka kam ïalehkai ha ki bynta bapher bapher”, ong u bah Pius.
Watla ïa ka madan Mawphuior, Rangthong la dep ban plie hadien ba la ïoh bna pyntrei hynrei haba peit pat ka dang donkam shibun kiei kiei ban leh khnang ba ki samla kin ïoh ïa ka rynsan kaba biang tam ban pyni ïa ki sap ki phong kiba ki don, u la ong bad da kaba kular ruh ba nangne shakhmat halor ki jingdonkam ban pyntrei ne ban theh ki lad jingïarap ha kane ka madan u la ong ba un sa nang buddien shuh shuh na ka Tnad ba dei peit ha kaba ïa dei bad ka jingdonkam kynthup ïa ka gallery bad ka fencing bad kiwei kiwei ki jingdonkam da kaba kular ruh ba un kyrshan biang sa 10 lak tyngka na kajuh ka skhim.
Kum ka dak jong ka jingplie paidbah ia ka madan, la pynlong ïa ki jingïalehkai paralok ne ka Friendly Football Matches ha kaba ha ka liang ki shynrang, ka jingïakhun ka long hapdeng ka Veteran RCC&SA Team pyrshah ïa ki RCC&SA Players. Katba ha ka liang ki kynthei, ka RCC&SA Women’s Team pyrshah ïa ka Pynnoh Riwar Sports Academy.
La pynïaid ïa ka jingïalang da u Bah Fullmoon Jirod kum u Shongknor, bad ka jingkren khublei na u Bah Michael Syiemlieh, Chairman ka Cricket Committee jong ka RCC&SA.