Shillong, Naiwieng 08: Ka Shillong Lajong ka la pynkhihjar ha ka khyllipmat shuwa ban kut ban pynliem ïa ka Sanmer ha ka jingïakhun kaba nyngkong jong ka Group B ha ka lympung SSA Champions Cup 2026 kaba la long ha SSA Stadium ha ka sngi Saitjaiñ.
Hadien kane, ka Sohryngkham ka la ïalehkai bha ban pynliem ïa ka Mawkhar da 2-0 kol ha ka Group B lyngba ki kol jong u Damanglangki Makdoh (18′) bad u Macheaveen Nongbri (57′).
Ha ka jingïakhun ba nyngkong, ka Lajong ka la mad ïa ka jingduh jingkyrmen ha baroh kawei ka jingïalehkai namar ka la shem jingeh ban thep kol, hynrei u Wilbert Marbaniang (90’+4) u la thep ïa ka namtam ha ka minit pynjlan ba khatduh jong ka jingïalehkai ban khur ïa ka jingjop.
Ka Lajong kadei ka kynhun kaba la wan ba-ar ha ka Shillong Premier League mynta u snem bad ka la wan ruh ha ka kyrdan ba-ar ha ka Champions Cup ba nyngkong eh ha u snem 2025. Katba ka Sanmer pat ka la long ka lahduh jong ka Third Division 2026 bad kane ka dei ka sien ba nyngkong jong ka ha ka Champions Cup.
U nongap kol u Akash Thapa bad ka kynhun ki rangïalehkai ba shadien baroh kawei jong ka Sanmer ki la mad ïa ka jingtynjuh kaba tyngeh ha kane ka jingïakhun hynrei ki la lah ban ïalehkai bha. Ka jingïakhun ka la paw kumba kan kut khlem kol, tad haduh ba u Denzil Kharshandi u la trei shitom ban rah ïa ka bol na ka liang kamon shuwa ban pashat pat sha u Wilbert, uba la pyndep ïa ka kamram ban pynkhihjar.
Ha kaba sdang, ka SLFC ka la ïoh ïa ka kabu ksiar kaba thikna ha ka minit kaba saw hynrei ka jingpyrshang jong u Badondor Marbaniang kam shym la biang ban pynrung ïa ka bol shapoh kol.
Related Posts
Watla shah ñion hynrei na ka liang jong ka Sanmer ka la pyrshang hi katlah katïai ban thombor ïa ka Lajong haba ki lad ki lynti ki mih. Kaba bha tam na kine ka la jia ha ka minit kaba 12 ha ka por ba u Hilford Lyngkhei u la pashat ïa ka bol sha u Khrawkupar L Nongbri, hynrei ka jingpyrshang ka la shah pynthut noh ha u rangap kol ka Lajong u Banshanskhem Kharsyntiew.
Ka Lajong ka la bteng ban tehlakam ïa ka bol ha ka kylla miet, bad ïoh ruh ban pyrshang katto katne sha kol lyngba u Colinsalmon Lyngdoh ha ka minit kaba 60 katba u Riborlang L Lyngkhoi u la shah khanglad ha u Akash ha ka minit kaba 84.
Ka Lajong ka la pyrkhat ba ka la dei ban ïoh ïa ka kol ha ka por ba u Akash u la kem ïa ka bol na suiñ hynrei u la ïa tyngkhuh bad la u jong u paralok katba u dang leh kumta. U la ur ha madan bad pyllait ïa ka bol ha kaba ka Lajong ka la pynstet ban thep ïa ka shapoh kol. Hynrei u referee u la kyntait noh ïa kane.
Ha ka jingïakhun kaba bud, ka Sohryngkham kaba wan ba-ar ha ka Second Division, ka la ïalehkai bha ha baroh shilynter ka jingïalehkai. Ka la lamkhmat ïa ka kylla step da 1-0 lyngba ka kol jong u Damanglangki ha ka minit kaba 18.
Ha ka kylla miet, u Remark Kharmalki u la pynshad sawdong ïa ka bol ïa u rangap kol ka liang pyrshah hynrei ka jingpyrshang jong u ka la lait bad tyngkhuh ïa u diengkol. Mar kumta hi hadien kata, u Macheaveen u la pynjlan ar shah ïa ka kol lamkhmat da kaba pynkhihjar ha ka minit kaba 57. U la shah kyntait ban thep ïa ka kol ba ar jong u ha ka minit pynjlan namar ka jingstet jong u Skhembor.
Na ka bynta ka Mawkhar, u Donbok Sohtun u la ïoh ban pyrshang katto katne ki kabu hynrei kim shym la poi sha ka thong. Lah ban kdew ba kane ka kynhun ïalehkai kaba la rah ïa ka First Division kam shym la lah satia ban ïalehkai bha ha kane ka jingïakhun bad kan donkam ban pynjanai shuh shuh shakhmat na ka bynta ka jingïakhun kaba dang sah jong ka Champions Cup.
Ha kane ka sngi Nyngkong, ha ka Group A, ka Mawpdang, kaba dei ka lahduh jong ka Fourth Division kan aireng pyrshah ïa ka Mawpat (lahduh jong ka Second Division) ha ka por 2:30 baje mynsngi. Kane kan dei ka jingïalehkai kaba nyngkong ïa ka Mawpdang bad kaba ar ïa ka Mawpat hadien ba ka la pynliem ïa ka Nongkrem ha kaba sdang jong ka taïew ba ladep.