Ki Nongïalam ka HNLC kim dei ban don jingartatien ïa ka sorkar jylla bad sorkar pdeng : Dy CM

Shillong, Naiwieng 22 : U Symbud Myntri Rangbah ka Jylla ba khmih ïa ka Tnad Kam Pohïing ka jylla u Bah Prestone Tynsong mynta ka sngi Balang ula kyntu ïa ki Nongïalam ba hakhlieh ka Hynniewtrep National Liberation Council (HNLC) ba kim dei ban don jingartatien ïa ka Sorkar Pdeng bad Sorkar Jylla namar ki long kiba la pynkhreh ban ai ïa ka lynti ïaid kaba shngaiñ ba kin wan sah ka miej ïakren ïasuk.
Kat kum ka jingong jong u, ki Sorkar ki long kiba la khreh ban pynlong ïa ka jingïakren ïasuk wat shabar ka Jylla Meghalaya.
“Nga kyrpad biang ïa ki Nongïalam ba hakhlieh ka HNLC ba kim dei ban don kano kano ka jingsngew bad don ka jingsngew artatien namar ngi la shimkhia na ka Sorkar la ka dei ka Sorkar Jylla ne Sorkar Pdeng” ong u Bah Prestone.
“Lada phi sngew ba kam long shngaiñ ban ïakren hapoh Meghalaya, ngi long ba khreh ban ïakren shano shano ruh. Ka Sorkar Pdeng bad ka Sorkar Jylla ki long kiba kloi ban ïakren shano shano ruh. Lada phi kwah ban ïakren sha Kolkata lane ha kano kano ka Jylla, ngi long kiba la khreh ïa kata” ula ong haba bynrap “Namar kata, ka jingkyrpad jong nga ïa ki Nongïalam ba hakhlieh ka HNLC ka long shai bha ba ka jingkhang ka dang ïai plie bad ngi kyrpad ïa ki ba kin sngewbha ban wan biang sha ka jingïakren bad ngi long kiba kloi ban shong ïakren hapoh ka miej”.
Kane ka jingkren u Symbud Myntri Rangbah kala mih hadien san sngi ba u Chairman cum Commander in-Chief ka HNLC Bah Bobby Marwein bad u General Secretary cum- Publicity Secretary Bah Sainkupar Nongtraw ki la pynpaw ïa ka jingbym lah ban wan ïashim bynta ha ka jingïakren ïasuk tad haduh ba ka Sorkar kala kloi ban weng noh ïa baroh ki case ba la pynngat pyrshah ïa ki bad ban ïasoi ïa ka soskular sangeh iasiat.
“Nga la ïohi ïa ka jingkren jong ki Nongïalam ka HNLC…ka jingkyrpad jong nga sa shisien ïa ka HNLC ka long kumne, sngewbha wan biang sha ka jingïakren namar tad haduh ba ngi la ïakren markhmat ban tip ïa kaei kaba phi kwah ngin ym lah ban poi shano shano ruh. Ngi la pyni ïa ka jingshimkhia, ym duna ïa ka lai-saw bnai, ngi la kitkhia ïa ka bha ka miat ki dkhot ka seng, ngi la kitkhia ïa ka jingshngaiñ jong ki bad kam shym la don satia ka jingpyrshang ban kem ïa ki, balei ba phi dang don ïa ka jingsngew tieng ne sngewartatien” ula ong.
Halor ka rai ka HNLC ban pynkham ha u Vice Chairman ba dang shu thung thymmai u Teimiki Laloo ban khmih ïa ka jingïakren ïasuk, u Bah Prestone ula ong “Hynrei u Chairman ne Commander-in-Chief ne mano mano, nga tharai ka dei ka jingmut jong ki Nongïalam ba hakhlieh duh”.