Shillong, Naiwieng 22: Ka Khasi Students Union (KSU) ha ka sngi Balang ka la teh da ki Banner bad ki Poster ha kylleng ki bynta ka sor Shillong ban pynkynmaw ïa ka Sorkar Meghalaya Democratic Alliance (MDA) ba la ïalam da ka Nationa People’s Party (NPP) ba kan shimkhia ban pynïoh ïa ka hok jong ki san ngut ki Khasi-Pnar kiba la duhei ïa la ka jong ka jingim ha ka 22 tarik u Naiwieng, 2022 ha ka jingshah synreit kuli ha ki nongap pahara khlaw bad ki Pulit ka Jylla Assam ha ka shnong Mukroh, West Jaiñtia Hills District.
Ki san ngut ki Khasi-Pnar kiba la duhei ïa la ka jong ka jingim ki long u Tal Nartiang, u Thal Shadap, u Six Talang, u Shirup Sumer bad u Si Dhar.
Ka Sorkar Assam bad ka Sorkar Meghalaya ha ka 30 tarik u Nailur, 2023 ki la rai ban aiti ïa ka jingtohkit ïa ka jingjia ha Mukroh sha ka Central Bureau of Investigation (CBI). Ïa ki Judicial Commission ba la thaw da ki ar tylli ki Sorkar Jylla ban tohkit halor kane ka jingjia la pynkut noh shisyndon hadien ba u Myntri Rangbah ka Jylla Assam u Himanta Biswa Sarma bad u Myntri Rangbah ka Jylla Meghalaya u Conrad K. Sangma ki la ïakynduh ban ïakren ïa pynbeit ïa u pud u sam ha Khanapara.
Ki jaka kiba ka KSU ka la wah ïa ki Banner ki long ha Secretariat bad ha Khyndai Lad ha kaba ki Pulit ki la weng noh tang hapoh khyndiat por. Kiwei pat ki jaka ki long hakhmat u durmot jong u Kiang Nangbah, ha Motphran, Laitumkhrah bad ha GolfLinks.
Hadien ba ki Pulit ki la weng ïa ki Banner, ka KSU hapoh ka jingïalam jong u General Secretary u samla Donald V. Thabah ki la leit teh biang ha ka wat kaba ar ha Khyndai Lad bad hakhmat ka ophis jong ka Deputy Commissioner ka East Khasi Hills.
“Mynta u snem ngi leh ïa ka Poster bad Banner Campaign ka dei ka jingkynmaw bad ka jingai burom ïa ki san ngut kiba la aiti ïa la ka jong ka jingim na ka bynta ka ri bad ka jaidbynriew. Kane ka long ban pynkynmaw ïa ki paradoh parasnam ba ka jaidbynriew jong ngi ka don ha tmier ka riat bad ha kano kano ka por ngi lah ban shah thombor. Ngi la ïohi ïa kaei kaba jia ha Langpih, ha Madan Umwang, hajan Block-I bad ha Lapangap bad ngi pynsngewthuh ïa ki (paradoh parasnam) ba ngi dei ban long kiba la khreh ban ieng na ka bynta ka ri bad ka jaidbynriew,” u la ong.
Haba kynthoh ïa ka jingweng ki bor Pulit ïa ki banner ba la teh da ka KSU, u samla Thabah u la ong, “ka long kaba lyngngoh ha ki katto katne ki thaiñ ba ngi wah, ka sorkar ka ïaleh ban weng ïa ki Banner bad kane ka pynlynngoh ïa ngi haba tang ïa ki Banner ruh ki weng, katba kiwei kiwei ki kynhun ki bym dei na ka jaidbynriew jong ngi ki wah ïa ki Banner ha Khyndai Lad ym ju don ba weng bad ki neh da ki bnai, katba ïa ki jong ngi mar syn wah, mar syn weng.”
“Kane ka pynpyrkhat lehse, namarba ka dang don ka prokram jong ka tnat Sorkar ha kaba ki heh ki haiñ na kylleng ka thaiñ Shatei Lammihngi bad na ka ri India ki wan sha kane ka jylla ban ïashim bynta ha kata ka prokram, ka sorkar kam kwah ban pyni ba ka jylla ka don hapdeng ka jingshah thombor, ka don hapdeng ka jingshah banbeiñ bad ka jingshah pynïap na ka por sha ka por. Lehse ba ki don ki heh ki haiñ na Assam ha kaba lada ki ïohi ïa kine ki Poster ka pyntieng ïa ka Sorkar Meghalaya ïoh ki shah kynhied ne ki shah mai ha ki heh Sorkar Assam,” la kynthoh u samla Thabah.
“Ka jingkylli kaba ngi hap ban pyrkhat mynta ka long lada tang ban wah ïa ki banner ruh kim nud ban pyni hakhmat ka Sorkar Assam mutdur ynda ki la don ha ka miej jingïakren ban ïapynbeit ïa u pud u sam paramaki, hato ki nud ne kim nud ban ang ïa la ka shyntur ban kam ïa ka Mukroh, ïa ka Lapangap, ïa ka Khanduli, ïa ka Langpih bad kumta ter ter ki thaiñ khapppud kiba don hapdeng ka jingïakajia,’” la buh jingkylli une u nongïalam ka General Secretary ka KSU.
