Shillong, Naiwieng, 22: Ki nongtrei ASHA ha ka jylla hapoh ka lama jong ka Meghalaya ASHA Welfare Union (MAWU) wat hadien ba ki la dep ban kynduh ïa ka Myntri ka tnad ka Koit ka Khiah ka jylla, Kong Ampareen Lyngdoh hynne ka sngi hynrei kim pat lah satia ban rai la ki la hun ne kim pat hun ïa ki jingtyrwa ba tyrwa da ka sorkar ban kyntiew 1000 tyngka ka jingsiew ïa ki.
Katkum ka jingïathuh da ka President ka MAWU, Kong Merijune Myrsing la ong ba ka Myntri ka la phah ap ïa ki ar kynta khnang ba ka sorkar kan ai da ka jingthoh halor ki mat kiba ïakren ha kane ka jingïalang. “Ka jingïalang ka la wai naduh 1:30baje hynrei mynta wat hadien bun kynta ngim pat ïoh satïa ïa ka jingthoh na ka sorkar. Kumta ka eh bha ïangi ban rai namar ïa kane ka mat ngi hap ban kren bad ka Executive Committee kaba don kumba 200 ngut ki dkhot,” ka la ong.
Shuh shuh ka ong ruh ba watla kidei tang ki nongtrei ba rit hynrei kam long satia pat kaba shngaiñ ïa ki kum ki kynthei briew ban shu ïa ap sah mynmiet hapoh surok. “Ngi hap ban leit phai noh bad la shai (Sngi Palei) ngin hap ban lum da ka special Executive Committee ban shim rai namar kaei kaei kaba ngi ïakren kam pat urlong.”
Na ka liang ka President ka la pynpaw ruh ba ïa mynta hi, ki ASHA kin dang don shwa ha ka jingsangeh treikam katba ym pat lah ban pynbeit da kumwei pat. Ka ong ruh ba hadien ba ki la ïoh ïa ka jingthoh na ka sorkar kin sa shong da ka EC bad lada dei ba ki hap ban weng noh ruh ki lah ban weng noh ïa ka jingsangeh treikam.
Ha kawei pat ka liang ka la pynpaw ba dei tang ka jylla Sikkim kaba sngewthuh ïa ka jingtrei borbah ki ASHA namar ka siew haduh 10,000 tyngka shibnai katba ha Meghalaya pat ka ju siew baroh shi katta tang 2,000 tyngka shibnai.
