Pynjynsur ïa ki polisi ban pynkhlaiñ ïa ka khaïi pateng bad ki Ri ba marjan ka NE : CM

Shillong, Naiwieng 22 : U Myntri Rangbah ka Jylla Conrad K Sangma mynta ka sngi Balang, ula kyntu ban pynbeit noh ïa ki jingbakla ba don ha ka khana pateng (history) jong ka thaiñ Shatei Lam Mihngi bad pynjynsur ruh ïa ki Policy ki ban pynsuk bad pynkhlaiñ ïa ka khaïi ka pateng bad ki lad pynïasoh ïa kane thain shatei lam mihngi ka ri India bad ki Ri kiba marjan.
U Myntri Rangbah ka Jylla ula kren ïa kane haba plie ïa ka United Nations economic and Social Commission for Asia and the Pacific (UNESCAP) “Subregional Capacity Building Workshop for Bangladesh, Bhutan, India bad Nepal (BBIN) Connectivity” kaba long ha Taj Vivanta, Shillong.
U Conrad ula ong ba ka jingpynïasoh ïa ka thaiñ Shatei Lam Mihngi ka Ri India sha ki Ri ka East Asia bad South East Asia, ka dei kawei na ki mat ba kongsan eh jong ka Sorkar.
“Ka Khana pateng ka pyni ba ka don shibun ki khaïi pateg hapdeng kine ki thaiñ shuwa ka jingïoh laitluid bad ka don ruh shibun ka lad ha ka khaïi pateng bad ka jingpynïasoh ha ka thaiñ namarkata ngi donkam ban pynbeit ïa baroh ki jingbym biang bad jingleh bakla kiba la khanglad ïa ka khaïi pateng bad ki lad pynïasoh ba don mynshuwa” ula ong.
U Myntri Rangbah ula pyntip ruh ba ka thaiñ Shatei Lam Mihngi, lada ka jam shakhmat ryngkat ryngkat, ka lah ban synniang shibun ïa ka thong jong ka Ri ban pynkhlaiñ ïa ka ïoh ka kot jong ka Ri.
Ula ban jur ruh ba ka Act East Policy kam dei ïa ka ban shu kheiñ kyllum ïa baroh haba bynrap “Nga la ju kren naduh kaba sdang ba ka Act East Policy ka dei ban ïaid da ka Zone ne thaiñ. Ngi donkam ban ithuh kat kum ki jingdonkam ki thaiñ (zone) ban lah pynïaid shakhmat ïa ka Act East Policy”.
U Conrad ula pynpaw ruh ba ka Sorkar Meghalaya ka kwah eh ban shim kabu ïa ki lad ki lynti kiba don hangne ban pynkhlaiñ bha ïa ka khaïi ka pateng. “Pynjynsur ïa ki policy khnang ba ki paidbah kin nym mad jingeh ha kaba leh ïa ki kam khaïi, pyndonkam ïa ki jingtei kiba don kum ki Integrated Check Post, jingbha ïa ki surok ha khappud ki dei ki lad ki lynti kiba lah ban wanrah ïa ka jingkylla” ula ong.
Ula ong ruh ba ki jingïakren ïa khana hapdeng ki Ri kan ïarap ha kaban lum jingtip bad pynbeit ïa ki jingeh kiba don. “Nga kyrmen ba kane ka prokram ka dei tang ka jingsdang ban wanrah ïa shibun ki jingkylla” ula pynkut.
Kiwei pat kiba la ai jingkren ki kynthup ïa u Mikiko Tanaka Director South and Southwest Asia Sub-Regional Office bad kiwei kiwei ki kynrem ki lyndan.